انا اتجوزت واحد معرفهوش بسبب أخويا… بس بعد ما اتجوزنا عرفت كمان إن هو اتجوزني بسبب أبوه
يعني احنا الإتنين بسبب اهلنا حصل كده…
المهم بعد ما اتجوزنا هو في أوضة لحاله وانا في أوضة ومش بنتكلم مع بعض ابدا غير للضرورة…
انا عليا شغل البيت وهو عليه شغله اللي بيروحه ( أنا اسمي أيلين وهو إسمه سليم )
قعدنا كده أخوات اكتر من 8 شهور… سليم حرفيا مش طايقني !! وقدام الناس كلها إحنا أحلى اتنين في الدنيا لكن في الحقيقة لا طبعا…
هو من النوع اللي مش بيعمل مشاكل وهادي وفي حاله… وأنا كذلك يعني احنا الإتنين مختصرين بعض
البيت طول فترة جوازنا كله هدوء مفيش خناق ولا مشاكل أبدًا… بس الهدوء ده طبعا مش هيقعد لطول العمر يعني….
جه اليوم اللي قلب الهدوء ده رأس على عقب حيث كانت الساعة 3 الفجر كنت نايمة عادي في أوضتي…
صحيت فجأة بسبب إني كنت دايخة وحاسة أني عايزة أرجع كل اللي في بطني وجسمي كله سخن
خرجت من الأوضة جريت على الحمام وفضلت ارجع كذا مرة ولما خرجت من الحمام لقيته خارج من اوضته ولاحظ أن فيا حاجة !!!
” إنتي كويسة ؟
‘ اها انا كو….كويسة
” متأكدة ؟
‘ اه متأكدة
” طيب
مشي من قدامي نظراته بتقول أنه شاكك أن فيا حاجة… بس خبيت عليه لغاية ما اعرف إيه اللي بيحصلي ده…