__انا صدفه ٣٠ سنه ست جميله جدا متجوزه من سنتين من الشيف محسن ٣٢ سنه عن قصه حب كبيره اوى، كان الكل بيحكى عليها ويتحاكى عنها، لدرجه ان محسن لما حكى لحماتى عن قصه حبنا وانه خلاص لقى حب عمره وناوى يخطبنى لقيتها بتكلمنى علشان تتعرف عليه وبصراحه فالاول فرحت جدا وكنت بنبسط اوى لما تتصل بيا
علشان تتطمن عليه وتحسسنى بأنها زى امى اصل انا يتيمه الأم وعايشه مع بابا واخويا رامى الاصغر منى ب ٣ سنين، وبعد كذا مكالمه ما بينا انا وحماتى عرفتنى على بنت اختها عتاب اللى هى سلفتى دلوقتى وطلبت منى اروح ازورهم فى البيت وطبعا انا رفضت بس اصرت عليه وقالت إن عتاب موجوده ومحسن كان مسافر شرم فى المطعم اللى بيشتغل فيه ومفيش حاجه ان اروح اتغدا معاهم وخصوصا انها هتعمل الأكل بإيدها
وبالصدفه ان اليوم ده كان عيد الام وقولت لازم اروح ومعايا هديه وكنت محتاره اشترى ليها اي؟
لأنى معرفش هى بتحب اي ومبتحبش اي؟
اتصلت بمحسن وسألته وقالى ان اى حاجة منى هتكون حلوه وانا بهبلى ملقتش غير سلسله ماما الدهب الذكرى الوحيده منها اللى مش بقلعها من رقبتى ابدا، بس والله مستخسرتهاش فيها وخصوصا انها حسستنى بحنان الام اللى انا افتقدته من سنين..
لقيتها يوم عيد الام الصبح بتتصل بيا وعيدت عليه وقالت امك بتصبح عليكى وبتقولك انها مستنياكى وطبعا فرحت جدا وقومت لابست أجمل ما عندى ونزلت من البيت وفكرت اشترى ليها علبه قطيفه علشان احط فيها السلسه بس
قولت لأ انا هشترى شكولاته غاليه والسلسله هقلعها من رقبتى وهلبسهلها علشان تحس فعلا انها من بنتها وهى امى بجد، واشتريت الشكولاته