هنا: اسكتي دا انا هاعمل مصايب في فرحي … دا انا هاطلع من العربية ارقص .. وهاعمل فرح مصر كلها تحكي عنه .
ماهي: الله يكون في عونك يا آسر … والله صعبان عليا .
هنا: اسر قالي اعملي اللي نفسك يا هنون .
ماهى: ياحبيبي خايف على نفسه منك ومن جنانك .
هنا وهي بتقوم: مفيش احلى من كدا ..
ليليان: افرحي يا سارة ..دا فرح كاميليا بكرة .
سارة بدموع بتمسحها بسرعة: فرحانة اهو .
ليليان: معلش يا قلبي .. معلش .. انا مش عارفة اقولك ايه ؟.
سارة: متقوليش خلاص اللي عملته اخدت جزاءه .
ليليان: يا حبيبتي بالراحة على نفسك شوية .. بردو دا كان غصب عنك .
سارة: مش مقدر … بيعاملني معاملة وحشة اوي يا ليليان لو قاعد هو وكاميليا وجيت قعدت معاهم يقوم ويسيبني ومبياكلش معايا .. بياكل لوحده .. حتى الصباح بيصبحه على كاميليا بس … نظراته ليا كلها قسوة.
ليليان: طيب انتي ايه اللي غصبك على كدا … مكنتيش تقعدي معاه كنتي اقعدي مع مهاب .
سارة: اتهمني ان زي ما زمان عاقبت كاميليا وحرمتها من ابوها … هاحرمها من وجودي معاها في اكتر وقت هي محتاجني فيه .
ليليان: بس انتي مش هتستحملي ضغط الاعصاب دا .
سارة: اهو خلاص كاميليا هاتتجوز بكرة وانا هاسافر.
ليليان: وتسيبني … دا انا ما صدقت انك رجعتيلي .
سارة: غصب والله بس مش هاقدر اقعد في مكان كله رافضني فيه .
كاميليا جت عليهم: ماما تعالي ارقصي معايا يا حبيبتي .
( سارة مسحت دموعها بسرعة وقامت معاها … بتحاول تظهر الفرحة وهي جواها نار بتقيد ).