عز: خد يالا نروح نشغل اغاني ونرقص .
( عز غير مودهم كلهم والضحكة طلعت من قلبهم وشغل اغاني شعبي وزين مسك راسه من الصداع وليان وهنا اتفاعلوا معاه …ريهام اللي مش طايقه هنا ولا هزراهم وهاتموت وتعرف مراد وميرا فين واسر اللي بيلعب في تليفونه وكان متابع هنا وحركاتها وضحكتها حب جنونها واتمنى لو للحظة يقوم يتجنن معاها ).
زين: مراد بتتصل على مين ؟.
مراد: كاميليا …مبتردش …ادهم ابنك فين ؟.
زين: خرج من الصبح مش عارف فين ..تلاقيها معاه .
مراد بضيق: ولو معاه مش تستأذن ابوها ولا ايه …ولا هيا اتعودت اني مش موجود .
زين: اهدى ..في ايه ..دول شباب مع بعض تلاقيهم خرجوا …اتصل بادهم طيب .
مراد: حضرته مبيردش عليا .
( مراد اضايق وقام نادى سارة .. وقالها تحصله وهيا راحت وراه بتعب ).
سارة: خير يا مراد .
مراد: ممكن افهم بنتك فين ؟.
سارة: معرفش …خرجت من الصبح …ممكن تكون مع ادهم .
مراد: ممكن! دا اللي هو ازاي … مش المفروض تستأذن الاول ولا خلاص اتعودت ان مفيش اب … والام طبعا مش في دماغها حد .. فاضية تخرج مع صاحبها وابنه .. مش فاضية لبنتها .