فى شركه الجارحى .
زين: خير ايه رماك علينا … مانا كنت بتحايل عليك امبارح علشان تحضر اجتماع الشركه السنوى .
مراد: يووة يا زين مانت عارف ان مش عارف حاجة فى ام الشغل دة انا كنت باجى اهزر واروح … سيبك انت هى ليليان عامله ايه فى الحمل …سمعت انها تعبانه ؟.
زين: مرة تعبانه ومرة كويسه ومرة زعلانه ومرة فرحانه ومرة بتكرهنى ومرة بتحبنى ومرة بتكرة ريحتى ومرة بتعشق ريحتى
مرة مناخيرها كبرت مرة مناخيرها صغرت مرة تخنت مرة رفعت ههههههه واهو استحمل يا زين .
مراد: ههههه فعلا استحمل يا زين لغايه الباشا مراد ما يوصل بالسلامه .
زين: مراد مين انا هاسميه عز الدين على اسم ابويا… وبعدين مش كفايه مراد واحد فى حياتى انت عاوزهم مرادين كتير عليا يا مراد دة انا مستحمالك بالعافيه .
مراد: اصمالله عليك وعلى حواليك يا خويا ماله اسم مراد…دة حتى كل اللى اسمهم مراد عسلات .
زين: هههههه سارة بهتت عليك على فكرة .
مراد: طيب كويس بدام جبت سيرتها … انا جايلك علشان طالب خدمه منك .
زين: خير ؟.
مراد: عاوزك تروح لام سارة سعاد المفتريه انا طهقت يا زين انا هاموت على البت والمفتريه عامله خطوبه تلات سنين .
زين بخبث: ابقا صبر نفسك فى تلات سنين .
مراد: يوووووة مبقدرش حاسس ان هاجى فى يوم واعكها .
زين: ودة كان اتفاق يا مراد ومينفعش نرجع فيه واستحمل .
مراد بغيظ: ياعنى انت مش هاتساعدنى يا زين .
زين: لا … ويالا علشان ورايا اجتماع مع جيرمين .
مراد بخبث: جيرمين مين ؟.
زين: انت مسططووول يابنى جيرمين البنت اللى بنتعامل معاها فى لبنان علشان شغلنا … دة انت كنت هاريها معاكسه ياخى … ايه من كترهم بقيت تنساهم .
مراد بخبث: لا سلام اسيبك مع جيرمين باى .. وعلى فكرة انا زعلان .
زين: ههههه اتفلق .
( مراد كان هايموت وينتقم من زين وفكر فى فكرة وقرر ينفذها رغم انه عارف ان زين ممكن يولع فيه ).
مراد: الو يا سوسو .
سارة: ايوا يا مرادى .. مش انت لسه مكلمنى ؟.
مراد: كنت عاوز منك رقم ليليان مرات زين ومتسألنيش ليه بعد كدة هابقا احكيلك؟.
سارة: ليه ؟.
مراد: يابنتى اخلصى بقا هاتيه مش انا قولتلك متقوليش ليه ؟.
سارة: طيب ربنا يستر شكلك بتفكر فى مصيبه .. الرقم اهو ٠١٠………
مراد: طيب سلام .
(مراد قفل مع سارة واتصل على ليليان )
ليليان: الو
مراد: الو ازيك يا ليليان .
ليليان باستفهام: استاذ مراد ؟.
مراد: ايوا … انا اسف انى بتصل عليكى بس كنت عاوز اسالك هى سارة عندك .
ليليان: لا معنديش مجتش.
مراد: اووووف انا عمال اتصل بيها وتليفونها مقفول … اصل قولتلها انا ورايا اجتماع انا وزين مع انسه جيرمين فى الشركه وروحت الحق الاجتماع لقيت زين قفل الباب ومنع اى حد يدخل حتى انا… فقولت اروح لسارة بقا…بتصل بيها فونها مقفول .