يوسف: مش سهل الموضوع عاوز تخطيط … زين دا راجل له وزنه وتقله فى البلد وبيمشى معاه عربيات حراسه كتيرة والكل بيعمله حساب
عاصم: اتصرررف
يوسف: حاضر … بس انت ادينى وقت وهاتاخد اعلى شغل منى
فى بيت الجارحى
صباحا
زين: بالشفا يا لى لى
ليليان بابتسامه: شكرا
زين: زى مانتى متغيرتيش
ليليان: ازاى مش فاهمه
زين: ياعنى … شكرا واسفه بتقوليهم فى اليوم ميه مرة
ليليان: طيب معنى كدا حاجة كويسه صح
زين بحنيه: انتى كل على بعضك كويسه يا لى لى
ليليان: معرفش ليه مش حاسه انك مش جوزى
زين: نعم ؟! ليه بتقولى كدا … تحبى اوريكى صورة القسيمه
ليليان: لا طبعا انا واثقه فيك .. بس انا بتكسف منك . المفروض ياعنى مراتك متكسفش منك صح
زين: والمفروض انك وقعتى وحصلك فقدان ذاكرة ومش فاكرنى والمفروض انك بتتعرفى عليا كانك اول مرة تشوفينى
ليليان: طيب قولى اول مرة شوفتك فين وامتى وكان شكلى عامل ازاى
زين اتوتر: اول مرة شوفتك عندى فى الشركه كنت جايه مع قريبك عم حسن