اغرورقت عيناها بالدموع و هي تهز رأسها مغمغمة :
-إنتي مش فاهمة حاجة !
-فهميني ! .. هتفت “سلاف” بنزقٍ :
-لو مش فاهمة فهميني. و اقنعيني إزاي أكدب عنيا إللي شافتك معاه في سريرك يا إيمان. إنتي و هو منغير هدوووم..
اقنعيني إن إللي شوفته ده وهم مثلًا !!!
عصت عليها دموعها و لم تعد قادرة على حبسها أكثر، نزلت على خدّيها بغزارةٍ، بينما تستطرد زوجة أخيها بعدم تصديقٍ :
-إنتي يا إيمان ؟ إنتي تعملي كده.. دي كانت آخر حاجة ممكن تخطر على بالي. لأ دي كانت مستحيل تيجي قدام عنيا أصلًا. ليه كده. إنتي خلتيني بعد ما كنت حطاكي في مكانة عالية و شايفاكي زي الملايكة.. مابقتش قادرة أبص في وشك. بقيت قرفانة منـك !!!!
-ماحصلش حاجة ! .. قالتها “إيمان” بأنينٍ مخنوق :
-و الله يوم ما شوفتينا ماحصلش حاجة بيني و بينه. و أنا اساسًا اتفاجئت بيه. ماكنتش عارفة إنه جاي. هو عرف إني لوحدي عشان جه و كان بيقنعني أسيب مالك عشان نتجوز أنا و هو. و لما رفضت هددني و جرني على الأوضة غصب عني. إنتي جيتي في الوقت الغلط.. ماكنش هايعمل حاجة. كان بيخوفني بس عشان أغيّر قراري. و الله دي الحقيقة !!!
حدجتها “سلاف” بنظرةٍ غير مقتنعة و قالت :
-الراجل إللي يتجرأ على واحدة بالشكل ده إستحالة مايكونش قرّب منها كفاية. تقدري تنكري إن ماحصلش بينك و بينه أي قرب. تقدري تقسمي بالله إنه مالمسكيش يا إيمان !؟؟؟
فتحت فاها لكي تُنكر على الفور و تبرئ نفسها أمام زوجة أخيها، لكن الحروف توقفت على طرف لسانها، لم تستطع نطقًا، لم تستطع دفع التهمة عنها، لأنها صحيحة تمامًا، لقد أخطأت و مارست الرذيلة مع “مراد” بالفعل.. كيف عساها تنكر هذا إذن… كيف لها تقسم بالله كذبًا !!؟