خرجت نور في إيد أمير واول ما عيون أدهم وقعت عليها حس إنه في حلم من أول جمالها الطبيعي الجميل للفستان الجميل لملامحها لفرحتها اللي مالية عيونها اللي سحرته بجمالها، قرّب عليهم وعيونه عليها وخدها من إيد أمير وبا.س راسها بحب وخدها وراحوا قعدوا على الكوشة، الفرحة مكانتش سايعة قلب نور نظرة عيون أدهم ليها اللي مليانة حب وفرحة اخواتها بيها
وبحياتهم والفرح البسيط اللي كانت بتتمناه وسط أهل حارتها اللي بتحبهم والأناشيد الاسلامية اللي شغّالة من غير موسيقي زي ما كانت عاوزة كل حاجة كانت جميلة وبسيطة زي ما بتتمنّى
خلص الفرح وخدها أدهم وركبوا عربيته
با.س إيديها بحب وهي اتكسفت وبصّت في الأرض
سألته نور بكسوف: هنروح على فين يا دكتور؟
أدهم بضحك: إيه ده يا اسطى نونو انتَ لسه بتتكسف منّي ولا إيه ده أنا زي جوزك برضه
نور بصّتله بابتسامة وقالت: تعرف، أنا يمكن مش بعرف أرد على الكلام ده بس عاوزاك تعرف إن مشاعرك اللي أنا حسّاها جوة
عيونك أو تصرفاتك أو كلامك أنا حاسة زيّها وأكتر بس مش عارفة أعبّر
أدهم بحب: أنا عاوزك تتكلّمي زي ما انتِ عاوزة يا نونو عاوزك تكوني معايا كإنك مع نفسِك أنا وانتِ واحد من النهاردة يا نوّارة، بس ده ميمنعش إني أسمعها ها
ضحكت نور وسكتت