الحاجه بغضب وهي تضرب عصاها بالارض بقوه
= البت متجوزه وعلى سنة الله ورسوله
امها الله يجحمها كانت معرفاني انها مكتوب كتابها
ودخلت من غير فرح علشان ظروف موت جوز امها وانا سكت ايامها علشان معملش عداوه معاها واقدر اخد ورثكم من عمكم
ابو كامل بذهول
= ايه…بتقولي ايه ياما ..متجوزه .. انتي لسه متهماها في شرفها وكدبتيها لما قالت انها متجوزه
ليتابع بدهشه اكبر
= طب ليه خلتيني اخطفها واضربها ..
وليه حبساها دلوقتي.. ليه عملتي كل ده ليه
الحاجه بصرامه مخيفه
= عشان أرجع حقك وحق اخواتك الي الحيه إمها لهفته..
لتتابع بكره
= استغلت ان اخويا الله يرحمه كان كبير في السن
و اول ماخلفت منه خلته يكتب لها كل الي وراه وقدامه
ولما رحت اطالب بحقي من ورث اخويا طلعت ورق ان كل حاجه مكتوبه باسم بنتها
وانها متقدرش تديني حقي الا لما بنتها تبلغ سن الرشد وفضلت ساكته على امل اخد حقي منها
لكن بعد الصبر ده كله و بعد ما خلاص زهره بلغت سن الرشد كانت امها ماتت وزهره اختفت كأنها فص ملح وداب وكل الاملاك اتباعت
وابن جوز امها قال انها باعت كل حاجه و خدت ورثها وسافرت على بره
لحد امبارح جالي اتصال عرفني عنوانها و اتبعاتلي صوره لابنها وللقصر الي معيشه جوزها فيه من فلوسي وحقي من ورث اخويا
ابو كامل بصرامه
= يعني قصدك ان القصر والخير الي عايشه فيه ده كله بتاعها هي مش بتاع جوزها
الحاجه بسخريه
= بتاع جوزها .. ..انت عارف هي متجوزه مين..
متجوزه حتة واد فقير مش لاقي ياكل ابوه يبقى السواق بتاعهم ..الظاهر امها جوزته ليها عشان بنتها كانت بتحبه وهي كانت مدلعاها ومبترفضش ليها طلب
ابو كامل بجديه
= يعني انتي جيباها هنا عشان…..
الحاجه مقاطعه
= عشان تمضي على تنازل عن حقي في فلوس اخويا
ابو كامل بسخريه
= وموضوع شرفها ده عشان تكسري عينها و تخوفيها وتحسسيها ان روحها في ايدك تقوم تمضي من سكات مش كده …
ليتابع بتساؤل
=طيب وبعد كده ..بعد ما تمضي ايه الي هيحصل..
الحاجه بقسوه
= هتمضي وتغور تروح لحال سبيلها
أبو كامل بصرامه
= تغور… يبقى انا كده مش موافق
الحاجه بدهشه
= بتقول ايه..مش موافق ..انت عاوزني أسيبها بعد ماصدقت لقيتها ..ايه مش عاوز ترجع حقك انت وخواتك.. انت عارف ورثكم من عمكم يطلع أد ايه
أبو كامل بابتسامه صفراء
= عارف يا أما وعشان كده بقولك مش موافق
الحاجه بدهشه وعصبيه
= هي فزوره.. اتكلم علطول وقول قصدك إيه
أبو كامل بصرامه
= قصدي انا عاوز الورث كله وفوقيهم صاحبة الورث
شهقت الحاجه بحنق