نذهب بعيداً الى قصر الرفاعي
كانوا يجلسون جميعاً وكل منهم تتمتم بحديث مختلف مع الاخرى بصوت منخفض
عشق لحور : يا بنتي ايه مش هنتحرك الوقت هيتأخر وأبيه كنان هيحرق الموبايل اتصالات
حور بتفكير : طب اعمل ايه مفيش ولا فكرة جاية في دماغي والاستاذ اخوكي عايزها متحسش مجرد احساس اننا مخططين لأي شيء
على بعد خطوات قليلة كانت تجلس ماسة على أريكة منفردة وملامح الحزن بادية بشدة على وجهها فلم يذكرها احد ولو بكلمة ليعايد عليها بيوم ميلادها
الجميع ملتهي عنها بشدة حتى زوجها الذي لم يسبق وان نسى هكذا مناسبة حتى انه لم يتصل بها ولو لمرة واحدة ليطمأن عليها كالعادة ولم يمانع عندما اخبرته برغبة الفتيات في التجمع بقصر الرفاعي وتقضية اليوم سوياً وترك الاطفال عند جدتهم سمية والدادة هدى لا هي متأكدة انه لم يستمع لها جيداً فقد هز رأسه لها وعيناه تتابع الحاسوب الخاص به وبعض الملفات التي جلبها من الشركة لإكمال العمل في البيت حقاً كانت تتمنى أن تقضي هذا اليوم بأكمله بِجواره فقط تنهدت بحزن حسناً
ستعذره فمن المؤكد أنه انشغل بالعمل كي يضمن لهم ولأطفالهم حياة هنيئة
قاطع سرحانها اية التي نخزتها في يدها بخفة : ايه يا ماسة مالك وشك مقلوب بالطريقة دي في حاجة مديقاكي يا حبيبتي
رسمت شبه ابتسامة على وجهها : لاء يا قلبي مفيش بس مشغول بالي على آدم اصلي متعودتش ابعد عنه وقت طويل
اية بإبتسامة : يا ماسة احنا سايبين الولاد عند جدتهم والدادة هدى هنقلق عليهم وهما معاهم بعدين ده آدم بالذات ميتخافش عليه ده ساعات بحسه راجل يا بنتي مش عيل ابو خمس سنين
ماسة بإبتسامة فخورة وهي تستذكر طفلها الذي يفكر احياناً بتفكير رجل بالغ : اكيد لاء مش هقلق طبعاً
اية بمشاكسة : طب مش هتفرديها بقى
ابتسمت ماسة لها وبدأت بتداول الحديث معها هي ولجين
عشق بهمس : طب هنعمل ايه اكيد هما خلصوا التجهيزات واحنا لسا مغيرناش هدومنا ولا جهزنا نفسنا
تقدمت لجين منهم بعد ان الهت ماسة مع اية لتردف لهم: يا بنات انا جتلي فكررة هتعجبكم
وماسة مش هتحس بأي حاجة
عشق بلهفة : قولي ده انا دماغي شوية وهتتفجر
ضحكت لجين بخفة وبدأت بسرد الفكرة التي خطرت لها لتومئ الفتاتان بإعجاب
انتهت لجين لتردف حور بإعجاب : يخربيت دماغك دي يا بت ده انتي طلعتي مش قليلة
نظرت لجين لها بغرور مصطنع : ابقي فكريني اعطيكي دروس
ضحكت الفتاتان على غرورها الذي لم تستطع إتقانه
غمزت عشق لها لتبدأ لجين بالحديث بصوت مرتفع لتلفت انتباه ماسة وحاولت قدر المستطاع ان يكون صوتها به لمحة حزن واضحة : يا بنات انا عايزة اقولكم حاجة انا حاسة ليل معدش مبسوط معايا ومعدش قريب مني زي الاول ده بقى بيعاملني بطريقة غريبة اوي معرفش مالو انا معملتش حاجة تخليه يتدايق مني
حور وهي تشاركها الحديث بتمثيل متقن : تصدقي حتى فهد معدش بيقعد معايا زي زمان وعلى طول بيعمل نفسه مشغول