=كده الموضوع يعتبر منتهى .. دول تجار وكل اللى يهمهم الفلوس وانه يتم تعويض خسارتهم.. لكن المشكلة فى الراجل اللى بيقول انها اعتدت عليه من غير سبب وده صمم انه يعملها محضر تعدى
المحامي بجدية وبدون تفكير
= شمس هانم بتنكر انها عملت كده وعندنا كمان شهود لو سعادتك تحب.. كمان ياريت تعملنا محضر ضد الراجل
ده انه هو اللى حاول يعتدى عليها وبدون سبب.. بس ياريت تدينى دقايق اتكلم مع عاصم بيه الاول قبل ما تفتح المحضر يمكن يفضل ان نحلها ودى
الضابط بهدوء
= اتفضل وبلغنى بقراركم.. وعموما الواد ده ملقح في الحجز لو احتجتم تحلوها ودى معاه
ثم اشار لعاصم قائلا :
=اتفضل يا باشا اقعدوا في مكتبى وشوفوا هتعملوا ايه
قبل عاصم رأس شمس المدفون فى صدره وهو يقول بحنان
=تعالى يا حبيبتى معايا ومتخافيش انا معاكي ومش هسيبك
رفعت شمس وجهها الغارق فى الدموع وهي تقول بدهشة
=هو بيقول باشا لمين؟
وضع عاصم يده على كتفها وقادها الى الغرفة الخاصة بمكتب بالضابط وقال بهدوء :
= للمحامى .. اصله محامى كبير اوى وشغال عند عاصم بيه وهو اللى باعته معايا
ثم اجلسها بعنايه وهو يشير للمحامي بالدخول ليقول المحامى بجدية :
=فى محضر مقدمه واحد بياع ضد مدام شمس.. بيتهمها فيه بالتعدي عليه بدون سبب