=البت دى يابيه.. البت دى هى أس المصايب .. هى سبب الخناقة مع المعلم فرج وقلبت المكان كله نار
إلتفت الضابط لها وأشار لاحد امناء الشرطة قائلا له :
=هاتوهالى لما نشوف حكايتها ايه دى كمان
ارتجف قلبها بخوف وهم يقتادوها لاحدى عربات الشرطة
في نفس التوقيت ..كان عاصم يجلس بغرفة الاجتماعات يناقش بعض القرارت مع مدراء شركاته وكان يقول :
=مناقصة توريد كابلات الكهربا الاخيرة .. ارقامها اتسربت.. ولو مكنتش عامل حسابى وغيرتها في اخر لحظة كنا خسرناها وخسرنا معاها سمعتنا فى السوق
ليرد احد المدراء بتردد ويقول :
=سيادتك متأكد من الكلام ده احنا كلنا بنشتغل معاك من سنين وعمرنا ما كنا في موضع شبهات
نظر له عاصم وهو يقول بصرامة
=انا لو كنت بشك فيك ولو واحد في المية انت او أى حد من الموجودين هنا مكنتش هتبقى قاعد قدامى دلوقتى
ثم تابع بقوة قاطعة
= انا زى مابرفع اللى شغال معايا بضمير لسابع سما اقدر برضه لو خانى انزله لسابع ارض وافعصه بجزمتى .. واظن انتوا كلكم عارفين كده كويس
ارتفعت الهمهمات القلقة من حوله.. ليرفع بعينيه بصرامة وحدة تجهاهم ليصمتوا جميعا فتابع بقوة :
=كلامي ده مش تشكيك فيكم بالعكس انا واثق فيكم جدا
بس اليومين دول فى تحركات قذرة بتحوم حوالين شركتنا فعايز كل واحد منكم عنيه تبقى فى وسط راسه