أيان كان سايق بخوف عليها وكل شوية يبصلها في المراية ودمعته نزلت أسد بصله شاف دموعه عليها واستغرب وعقد حاجبيه وقتها عيونه جات في عيون أيان وكانوا باصيين لبعض
أيان بخوف: شوف نبضها
هز راسه أسد وحط اصباعه على رقبتها وايدها وقال: بيضعف، نبضها بيضعف
كان سايق أيان بخوف وقال: قربنا نوصل، قربناااا.
………………………….
مرام هي ونور كانوا ماشيين في القصر ونور بترن على يُسر ومرام على أسد وقالت: محدش بيرد
نور: ولا يُسر.
يُمنى كانت متوتره وعلامات خوف على وشها وقالت: اه من بنت جبل اه هتضيع الواد والله هتجراله حاجه.
مرام بغضب: حماتي هو كل مُشكلة تجيبي العيب على يُسر روحي نامي روحي علشان يكون فيكِ طاقه تستقبلي
اختك وعيالها بكرا روحي.
يُمنى بغضب: طالعه وسيبهالكم مِخضره، طمنيني لما يجي اخوكِ
نور هزت راسها وقالت: حاضر
علي هو وداخل من باب القصر: لازم الزعيق واللسان الطويل كل يوم لازم يا ست مرام
مرام: علي والله ما نقصاك، وبعدين انت كنت فين هدومك كلها طين مش شايف نفسك.
علي بتوتر بص لنفسه ورجليه وقال: كنت في الشركة والعربية عطلعت في الطريق واحتجت صيانه واتوسخت يا مرام.
مرام هزت راسها وقالت: طيب، طيب، أسد في القِسم ولا فين لا هو ولا يُسر محدش بيرد.
علي عقد حاجبيه وقال: رنيتوا عليهم طيب
نور: ايوا يا علي.
أم حسن طلعت من المطبخ وقالت: في إيه يا ولاد لسه أسد مردش
مرام: لسه يا ام حسن روحي نامي علشان تستقبلي حسن يدوبه هيبقى جاي تعبان والله اشتقناله.
نور بلهفه: جدا جدا والله.
علي بصلها وقال بشك: ست نور مالك، ها خير… خير
نور بتوتر: مفيش يا علي اشتقنا لـ حسن صح، صح يا مرام
هزت راسها مرام وضحكت: اشتقناله، اشتقناله
أم حسن وضحكت: يلا تصبحوا على خير يا ولاد متقلقوش تلاقيه أسد ويُسر في فندق كده ولا كده متنسوش هما عِرسان جُداد برضوا.
مرام: كانوا ردوا على التيلفون… لا في حاجه غلط ورنينا على الفنادق بتاعته هو وأيان منزلوش ولا في اي فندق وأيان مبيردش اكيد في حاجه اكيد
علي: اطلع اغير انا وهروح ادور عليهم.
مرام: يلا يا حبيبي جاية معاك.
علي بصلها وهز راسه بيأس وقال: حبيبك اه حبيبك لا خليكِ مع نور، خليكِ هغير وحدي مش محتاجك.
مرام بصتله بهدوء والدموع اتجمعت في عينيها وهزت راسها طلع علي ونور حضنتها بحزن وهي كانت باصه لـ طيف علي هو وطالع على السلم بغضب والدموع على خدها.
نور هي وبتمسحلها دموعها: متزعليش منه يا مرام علي ميقصدش، ده مهما كان زوجك
مرام بدموع هي وبتشاور لنفسها: ولا في يوم قالي بحبك، انتِ مراتي، انتِ كل قوتي، انتِ كل احتمالاتي يا مرام، زواج ايه يا نور احنا بنبين اننا مبسوطين قدامكم بس لكن في اوضتنا خلافاتنا مبتخلصش تلت سنين واحنا مفيش
امل للخلفة بعد البنت اللي اتوفت، وده السبب العائق اللي ما بينا وعلي كان نفسه في حِتت عيل انيس ليه وانا مقدرتش بس دي حاجه بتاعت ربنا، من وقت زواجنا علي مبيحبنيش يا نور بيعاملني كويس قدامكم بس علشان خايف على زعل حماتي فاض بيا يا نور والله فاض بيا و محدش حاسس بـ هنا محدش
كانت بتشاور على قلبها وقالت: انا وعلي مينفعش نكمل كده لما يجي وقت الكلام، هطلب منه الطلاق.
نور بصدمه هي وبصالها بغضب وقالت: مرام انتِ اتجننتي تروحي فين ده وانا ولا أسد ولا وماما نرضى نسيبك مستحيل نعيش من غيرك في القصر مستحيل انسي الطلاق وان شاء الله هتتحل، يبنتي هتتحل.
باستها نور من خدها ومسحت دموعها وقالت: تعالي نشرب قهوة واحكيلك عن حسن.
مرام رغم دموعها ضحكت وقالت: اه من المِحتالة الصغيرة اه
وحضنتها ودخلوا المطبخ.
………………………..
نزلوا من العربية أسد كان عاري كان ببنطلونه بس وشايل يُسر ما بين ايديه وهي مستسلمة ومش دارية بنفسها دخل بسرعة رهيبة وأيان كان بيصرخ: دكتوووور… دكتور
الممرضين جابت النقالة حطوا عليها يُسر وأسد قال بهستريا هما وبيجروا بيها: اخدت طلقه في ضهرها بسررررعة.
دخلوها اوضة العمليات وقفلوا الباب.
أيان قعد على الكرسي وحط إيده على راسه وقال بدموع: استر يارب استر.
أسد قعد في الأرض جمب الباب وسند راسه على الحيطه زهرة كان دوامها متأخر وخلصت الساعة 12 وجت تطلع مسكتها الممرضة: دكتورة زهرة
زهرة: نعم
الممرضة: اخوكِ أيان بيه جه للمستشفى ومعاه واحده متصاوبه هو وأسد العشماوي.
زهرة بخوف حطت ايدها على بُقها وقال: هما فين دلوقتي
الممرضة: في اوضة العمليات.
جريت زهرة ما بين الطرقات وطلعت عندهم وصلت للدور شافت أسد قاعد في الارض وكأنه في عالم تاني مبيردش على حد ولا بيكلم حد.
أيان جريت عليه وقالت: أيان انتَ بخير
أيان قام وحضنها وقال: انقذي يُسر يا زهرة.
زهرة بصدمه: يُسر؟!
طلعت تجري الممرضة وأسد قام وقال: في ايه في ايه
_المريضة محتاجة 4 أكياس دم زمرة دم (O-) بسرعة.
أيان مسح دموعه وهز أسد: أسد أنت نفس زمرة دم يُسر أسد رد أسددددددد.
أسد كان تايه وودانه بتصفر أيان هزه وصرخ فيه: فوووق
أسد هز راسه وقال: تعالي يا دكتورة.
راح مع الممرضة
زهرة: انا لازم اتدخل.
جريت في اوضة الملابس
أيان كان قاعد وخايف وبيقول: يارب
أسد كان كل تفكيره في يُسر والممرضة بتسحب منه دم وقالت: يبيه حضرتك جسمك ضعيف سحبنا كيسين و….
أسد هو وباصص لـ رُكنٍ ما وقال: كملي.