قالت بصوت يملؤه الأسف :
-اكتشفت إني كنت بديله هو و أهله من حبي ووقتي وصحتي بدون أي حدود ولا مقابل ولا حتى كلمة شكر.. لدرجة إني قاعدة الوم نفسي إزاي كنت بغسل
لمامته المواعين و عمالة أقول لنفسي كنتي شايفة نفسك خدامة لدرجة أنك بتنظفي لها قرفها و شايلاها هي و عيالها و في الآخر ياكلوا علي حقي و يتهموني في شرفي و آخد علقة موت اتطلق بسببها ؟
ثم أضافت بقهر:
-ومش قادرة أسامح نفسي إني سيبتهم يمنعوني من زيارة بابا مريض الكانسر و هما عارفين أنه في آخر ايامه و مات من غير ما أشوفه..بنهار نفسيا لما بفتكره ..
-بصي كل حاجة بسبب متظلميش نفسك بجلد الذات إنك إزاي سكتي، يمكن لو كنتي مشيتي في الأول كنت هتفضلي تسألي نفسك هل أنا تسرعت ؟ بس بعد ما استحملتي وعديتي قدرتي تفهمي
أدي وقت الزعل حقه عشان لما ترجعي أحسن تبقي أقوي
شهقت كاميليا بندم:
-عمالة أقول كنت ساكتة ليه ؟
إزاي أسامح نفسي إني عملت في كدا ؟ ..و إزاي مزعلش إنها اتحسبت عليا جوازة و هما كلهم شهرين أو ثلاثة اللي قعدتهم مع زوجي والباقي كنت عايشة لوحدي مع أهله .. اللي حصل مكنش سهل أبدا
-علشان كده بقولك خدي وقتك في الزعل لكن متستمريش عليه .. متسمحيش له يظلمك مرتين .. هو ظلمك قبل كده.. لكن إياك تسمحي لنفسك أنه يظلمك مرة تانية وتفضلي واقفة مكانك بسببه
انسي انسي و تجاوزي و اشتغلي على نفسك و شخصيتك و تفكيرك واشغلي نفسك أوي و متبصيش وراك الماضي راح بإيجابياته و سلبياته اتعلمي بس و كله بالوقت بيعدي