رفع حاجبه بدهشة:
– واحنا من امتى بنشغل عندنا حد بيتعلم يا آنسة نسمة ولا عشان الانسة تبعك بس
احنا شركة مالتي ناشونال لو أنتِ ناسية
شعرت نسمة بالاحراج .. فردت بتبرير قائلة:
– معلش يا مستر نديم ياريت تديها فرصة .. انا عارفة أن ده مرفوض بس حضرتك ممكن تعملها exception ولو هي متعلمتش بسرعة ومطلعتش قد الشغل ممكن متكملش ..
ثم اردفت نسمة بقلة حيرة:
– وبعدين ما يمكن هي اللي مترتاحش ومتكملش ولا إيه رأيك يا فندم ؟
همت كاميليا بالرحيل ولكن أوقفها صوت نديم الرجولي القوي وهو يسألها:
– مستعدة تشتغلي معانا آنسة كاميليا ؟
عادت ابتسامة كاميليا ترتسم على شفتيها قائلة بحماس:
– اكيد يا فندم
اقترب منها قائلا بتوجس:
– هتقدري تنفذي اي حاجة مطلوبة منك ؟
استدارت تنظر إلى وجهه مباشرة .. ومن ثم اومأت له بالإيجاب
أردف نديم باستهزاء:
– في كذا حد اشتغل معانا قبل كده لسه متخرجين ومبيكملوش الشهر معانا … ولا واحدة فيهم عرفت تتحمل مسؤولية معانا..
كاميليا بثقة:
– وانا أن شاء الله هكون قد المسؤولية معاكم
– هنعمل اختبار صغير اشوف هتقدري تشتغلي ولا لا