دخلت الحمام غسلت وشها بجمود وكانت بتقول بهستريا: متبكيش متبكيش اهدييييي اهدي، لو دخلتي في نوبة البكا مش هتخرجي اهدييي
غمضت عينيها لـ ثواني وخدت نفس عميق وفتحت عينيها وابتسمت سرحت شعرها عملته كحكة عالية ونازل منها خصلات بُنية مع بشرتها الخمرية وعيونها الزرقة اللي لونها بهت من كتر البكا طلعت من الحمام مشافتهوش نزلت
لـ تحت جريت على فاطمه اللي في الصالون وحضنتها: فاطمه
كان ملاحظها أسد هو وبيفطر ومرام ابتسمت وبصتلها وقالت: اه روحي اه.
امه كانت بصالها بغضب وقالت: شكلها بنت جبل الخديوي اتعودت على القصر وبرطعت فيه
فاطمه مسكت ايدها ويُسر اخدت نفس عميق وقالت: تعالي نطلع الجنينة يا فاطمه.
طلعت يُسر من قدامهم هي وفاطمه
مرام بغضب: امي
يُمنى: ايه مش قصرنا ده انا قولت حاجه غلط.
أسد كان بياكل ومتجاهلهُم وعلي باصصلهم وبياكل وقال: سيبي البت في حالها يا امي كفاية.
يُمنى: عضيتها انا يعني لا إله إلاّ الله.
برا القصر في الحديقة
فاطمه: امسكِ تيلفونك اهو بالعافية جبته من السرايا وإلا كانوا هيمسكوني ويحققوا معايا
يُسر: طيب ازاي جيتي هنا
فاطمه: سألت على القصر واخدت عنوانه وجيت ماشاء الله يبنتي جوزك مشهور قوي.
يُسر: بلا شهره بلا نيلة، انا مجبورة على الجوازه دي
فاطمه: ازاي
يُسر: يعني عايزه اهرب من هنا يا فاطمه