حازم : انا يشرفني ان اطلب ايد الآنسة رقية بنت حضرتك
رقية اتصدمت من كلامه
والد رقية : هو فعلا مش وقته
وانا بالنسبالي معنديش مانع ويشرفني طبعا…بس القرار في الأول وفي الآخر يرجع لرقية
إيه رأيك يا بنتي
رقية سكتت شوية و بعد كده قالت : شوف يا حضرة الظابط
انت انسان كويس جدا ومليون بنت تتمناك …بس انا خلاص مبقيتش أفكر في الموضوع ده تاني…واتمني يكون كلامي
ما ضايقش حضرتك…عن إذنكم
رقية دخلت أوضتها وحازم زعل جدا ..كان نفسه ياخد فرصة يعوضها عن كل اللي شافته ويقولها انه بيحبها بجد
رقية بدأت ترجع لحياتها الطبيعية وشغلها اللي بتحبه في شركة معروفة
وفي أول يوم ليها في شغلها الجديد كانت خارجة من بيتها ولقيت ناس كتير جيرانها راحولها اول ما شافوها
كانوا بيبصولها بانكسار
واحدة منهم قالت : سامحينا يا بنتي
انا عارفة اننا ظلمناكي كتير وجرحناكي بكلامنا
و بدل ما كنا نقف جنبك…صدقنا كل اللي اتقال بسهولة ونسينا البنت اللي اتربت وعاشت وسطنا وعمرنا ما شوفنا منها غير كل خير
راجل كبير : احنا غلطنا في حقك كتير وندمنا علي كل حاجة حصلت مننا وكل كلمة قولناها
رقية : انا كنت فاكراكم عيلتي التانية اللي هتقف جنبي بس انتوا وجعتوني أوي وكنتوا بتقتلوني بدل المرة ألف.
ربنا اللي بيغفر ويسامح.
وسابتهم ومشيت
( أحيانا الناس كمان بتكون وسيلة للظلم …بتصدق اي حاجة لمجرد ان فلان قال كذا …مش بتفكر ان ممكن يكون الشخص مظلوم واللي اتقال كدب…ياريت منحكمش علي حد لمجرد انك سمعت عنه…جرب تقرب منه الاول وتعرفه بنفسك )
في بيت رقية
كانت قاعدة مع والدها وبعد شوية أحمد جه قعد معاهم
أحمد بتوتر : كنت عايز اخد رأيكم في حاجة كده
والده : خير يا ابني
أحمد : أنا ان شاء الله ناوي أخطب
رقية بفرحة : بتتكلم بجد
أحمد : اه والله
والده : طب يا ابني علي خيرة الله
مين هي بقي اللي خطفت قلبك
أحمد : واحدة انتوا تعرفوها كويس
رقية بفهم وغمزتله : اه عرفت
والدها : هو إيه اللي عرفت ما تقولوا مين