آسر في الشركة حالته غريبة وعلي طول سرحان ومش طايق نفسه وخايف علي رقية لتكون آذت نفسها
معتز: مالك يا آسر..إيه برضه موصلتوش لحاجة عنها
آسر بحزن: لا يا معتز دورنا في كل مكان وبرضو مفيش فايدة
معتز: ربنا يصبر أهلها وان شاء الله البوليس هيلاقيها اطمن
اهل حازم حضروا الفرح ورجعوا تاني يوم البيت بعدها علشان شغل حازم
بسمة بتفكر تقول لأحمد علي حقيقة آسر بس في نفس الوقت خايفة لانها وعدت رقية
وفي النهاية قررت انها تقابله وتحكيله يمكن يقدر يتصرف
أحمد جاتله مكالمة وأول ما شاف اسم المتصل رد بلهفة وبعدها نزل بسرعة
في بيت حازم
رقية كانت قاعدة مع ملك ولقيوا حازم داخل عليهم
وقال لرقية بإبتسامة: معايا ضيف جاي يشوفك.
وقال لشخص اتفضل ادخل
رقية وقفت اول ما شافته و عينيها دمعت
وقالت بفرح : أحمد
وجريت عليه حضنته وأحمد بادلها الحضن كأنها غايبة عنه من سنين
وقال بدموع: كده تعملي فينا كده إحنا كنا هنتجنن عليكي …بس الحمدلله انك بخير
رقية: وحشتني أوي
بس قولي وصلت هنا ازاي
حازم: لا دي قصة طويلة تعالي نقعد الاول واحكيلك
فلاش باك
حازم كان اتصل بأحمد وطلب منه يقابله ضروري
أحمد : خير في أخبار طمني
حازم: اطمن أختك بخير بس تعالي معايا دلوقتي
أحمد بفرحة: تمام انا هاجي وراك بالعربية
حازم : لا انت سيب عربيتك عادي قدام المركز وهنتحرك من الباب التاني وهنركب عربيتي
أحمد: بس ليه ده كله
حازم: هفهمك بعدين يلا
باااااك
حازم: مكنش ينفع نتحرك عادي ليكون حد بيراقبه فعلا زي ما قولتي وعلشان تبقي في أمان أكتر
أحمد مش مصدق انه شايف أخته قدامه وقال: انا عرفت كل حاجة من حازم باشا والحمدلله ان ربنا بعته في الوقت المناسب علشان ينقذك
وعلي فكرة بقي انا مصدق آخر كلام قولتيه لان عارف أختي مش بتكذب بس كان لازم أبان عادي علشان للاسف مفيش دليل
حتي الدليل اللي كان معاكي اختفي…مكنتش عايز آسر يشك في اي حاجة لحد ما أوقعه
وعلشان اثبتلك كلامي انا في حاجة كنت ناوي أسألك عليها
رقية : حاجة إيه
مسك موبايله وطلع رقم وقالها هو ده الرقم اللي كان بيبعتلك ولا لا
رقية بصت في الرقم كويس: لأ مش ده
أحمد : متأكدة
رقية: اه طبعا الرقم اللي كان بيبعت منه هو نفس اللي كان في الشات اللي بعته ليوسف يوم الفرح انا اه مش فاكراه كله بالظبط بس مش ده انا متأكدة
أحمد: يبقي كده اتأكدت ان انا ماشي صح
عرف يلعبها كويس أوي ومثل الدور بالظبط
حازم : علشان كده راح اول واحد يبلغ بس عن رقم تاني علشان يبعد عن نفسه الشبهة وفي نفس الوقت يقدر يبعتلك من غير ما حد يشك فيه
أحمد بغضب: مش هسيبه ابن الك*لب ده
وحيات أمه لاندمه علي كل اللي عمله
حازم: اهدي يا أحمد دلوقتي
وبعدين خليك فاكر ان ده مش دليل برضه واي حاجة غلط هتعملها مش هتبقي في صالحك ولا في صالحها
أحمد: عايزني أعمل إيه اسيبه كده..اختي كانت هتموت بسببه