حازم: تمام علي العموم من النهاردة انا هبقي علي تواصل معاك بكل حاجة ياريت تسيبلي رقمك
وفعلا حازم خد رقم أحمد وهو عطاه الكارت بتاعه علشان يكلمه
حازم :عايزك تطمن خالص…انا هعمل كل اللي أقدر عليه علشان أرجعهالكم بالسلامة ان شاء الله
أحمد : يارب…شكرا يا حازم باشا
وانا هستني حضرتك تبلغني لو عرفت توصل لاي حاجة عنها
حازم بإبتسامة: العفو يا بشمهندس ده واجبي
وان شاء الله لو في جديد هكلمك
أحمد مشي وحازم قعد يفكر في موضوع رقية…وشوية وخرج وهو بيكلم محمود صاحبه وطلب منه يجمعله معلومات أكتر عن رقية ويبلغه بسرعة
في بيت رقية
بسمة بتروح تطمن علي والد رقية وبتشوفه لو محتاج حاجة
و دايما سرحانة وبتفكر في رقية وبتتمني انها تكون بخير محصلهاش حاجة
في بيت حازم بيستعدوا للسفر علشان يحضروا الفرح
والد حازم: يلا يا ولاد الناس منتظرينا علشان يكتبوا الكتاب
نزل حازم اللي كان باله مشغول بحاجات كتير نفسه يعرفها
وبعد شوية نزلت والدة حازم وملك أخته و رقية واتحركوا بالعربية
بعد ساعات كانوا وصلوا هناك
عم حازم ومرات عمه استقبلوهم و رحبوا بيهم
وراحوا بعدها يسلموا علي العروسة اللي فرحت جدا لما لقيت حازم جه
سلمي: كنت هزعل جدا لو مكنتش جيت يا أبيه حازم
بصراحة انا قولت هيكون مشغول ومش هيقدر يحضر كتب كتابي
حازم بإبتسامة: هو انا اقدر محضرش كتب كتاب ولا فرح اختي برضو…وقال بهزار
خدتلك اجازة أهو يا ستي يلا عدي الجمايل
وقعدوا يضحكوا وسلمي خدت بالها من رقية اللي كانت واقفة جنب ملك
سلمي : بقي كده تخطب من ورايا
بس ذوقك حلو أوي يا أبيه عرفت تختار
حازم سكت معرفش يرد ..و رقية اتكسفت جدا و وشها بقي أحمر
والدة حازم لاحظت خجل رقية واتكلمت: رقية تبقي صاحبة ملك وجارتنا فحبينا انها تيجي تحضر معانا وتشاركنا فرحتنا
سلمي: انا آسفة
شكلي عكيت الدنيا ولا ايه…علي العموم نورتينا
رقية بإبتسامة : ولا يهمك
شكرا جدا وألف مبروك
سلمي بابتسامة : الله يبارك فيكي
وبعد شوية كانوا بدأوا يكتبوا الكتاب