عند رقية
والدها صحي علشان يصلي الفجر شاف باب أوضة رقية مفتوح دخل علشان يطمن عليها بس الاوضة كانت فاضية و رقية مش موجودة
قلق وقال لنفسه: راحت فين
ممكن تكون في الحمام او المطبخ هروح أشوفها
ولسة هيخرج يشوفها لقي….
يتبع….
والد رقية لسة هيخرج يشوفها لقي ورقة علي المكتب بتاعها كانت مكتوبة بخط رقية وبدأ يقراها وكان مصدوم من اللي مكتوب فيها
“انا آسفة يا بابا علي كل حاجة حصلت بس غصب عني.. بس انا مش هقدر أستحمل الظلم ده كله و كلام الناس ونظراتهم وكمان آسفة لحضرتك ولأحمد علي اللي بتسمعوه بسببي ومع ذلك بتخبوا عليا كل اللي بيحصل معاكوا و مصدقيني وواقفين في ضهري طول الوقت
انا مش هقدر اشوف حد بيكسركم وبيجرحكم بالكلام
كل اللي أقدر أقوله انك صح و كل ده كدب والله يا بابا …انا بنتك وعمري ما أعمل حاجة توطي راسك…انا أموت ولا أعمل حاجة زي دي
انا دلوقتي هيريحوا مني ومن مشاكلي واتمني تسامحوني..”
رقية..
والد رقية دموعه نزلت وقال: ليه يا بنتي كده
ودخل يصحي أحمد علشان يدوروا عليها
عند آسر
قاعد يبعت رسايل لرقية علشان يعرف ردها بس مكنش في رد جرب يتصل بيها لقي الموبايل مقفول
اتعصب جامد وقال مهما تعملي هتروحي مني فين…هفضل وراكي لحد ما تبقي ليا انا وبس
___________________________
في مكان تاني
رقية كانت مش قادرة تمشي بسرعة من التعب بس بتحاول تسرع لحد ما تبعد خالص قبل ما حد يشوفها او يوصلها
ومرة واحدة وقفت مقدرتش تكمل ولسة هتعدي الطريق لقيت عربية جاية بسرعة رهيبة مكنتش قادرة تمشي اسرع ووقعت وخلاص العربية كانت هتخبطها بس وقفت علي آخر لحظة
نزل منها شاب وراح يطمن علي رقية
الشاب: يا آنسة انتي كويسة..حصلك حاجة
رقية قامت وقالت بتعب: الحمدلله كويسة
الشاب: انا آسف جدا الطريق كان فاضي وضلمة ومخدتش بالي..ثم إيه اللي يخليكي تمشي في طريق زي ده و وقت متأخر كده و..قاطعته رقية
رقية بنرفزة ودموع: لو سمحت متكملش كلامك انا مش ناقصة وفيا اللي مكفيني وزيادة… وآسفة علي اللي حصل عن إذنك وسابته ومشيت بسرعة