في مكان تاني
أحمد : مساء الخير يا بابا
والده: مساء النور يا ابني كويس انك رجعت بدري جيت في وقتك كنت هكلمك
أحمد : تحت أمرك يا بابا وبص حواليه وقال: رقية نايمة ولا إيه
والده: لا يا ابني بسمة صاحبتها جات خدتها تغير جو شوية
أحمد: طب كويس
والده: قولي مفيش جديد في موضوع أختك
أحمد: للأسف يا بابا لحد دلوقتي الشرطة مش عارفة توصل لحاجة شكل الكلب اللي عمل كده مش سهل وعامل حسابه كويس اوي بس هيروح مني فين والله لادفعه تمن كل حاجة عملها في أختي
والده بحزن: انا مش هرتاح ولا يهدالي بال غير لما ارجع حقها وكرامتها قدام الكل
أحمد : هيرجع ان شاء الله يا بابا اطمن وكمان عرفت ان آسر كان مقدم بلاغ بالرقم اللي كان مع يوسف وبيدور معانا
والده: آسر ..والله الشاب ده طلع ذوق و محترم
اذا كان هوا ولا والدته مسابوناش واحنا في المستشفي ودايما بيسألوا انا مستغرب انه اخو يوسف شخصيتهم غير بعض
أحمد: فعلا يا بابا عندك حق
خلصوا كلام وبعدها احمد استأذن ودخل أوضته علشان يستريح
عند رقية وآسر
آسر بتوسل وحزن: رقية انا آسف عارف اني غلطان بس مكنش قدامي حل تاني
طب شوفي انا مستعد اثبت برائتك للناس والعالم كله وهصلح كل اللي عملته بس اديني فرصة
رقية بحزن: تصلح إيه ولا إيه
هتقول للناس انا اللي عملت كده
هتقولهم ان انت اللي دمرت حياتي وسبب طلاقي ولا هتقولهم ان انت اللي شوهت سمعتي
هااا رد عليا هتصلح غلطتك ازاي
آسر: هصلح كل حاجة وهعملك كل اللي انتي عايزاه بس ليا شرط واحد بس…انك تقبلي وتوافقي تتجوزيني
رقية بصتله بصدمة: لا ده انت مجنون و مريض فعلا
آسر: صدقيني ده الحل الوحيد.. ما انا لما اتقدملك ونتجوز الناس هتعرف انك بريئة وان العيب من يوسف
جوازنا هو اللي هيسكت الناس