دخلت المطبخ – حورية اتقلبت على السلم.
دخل وراها بعد ما كان مكمل مَشي ناحية الصالة – حورية! حصلها حاجة يعني.
سابت اللي في ايدها وبصتله برفعة حاجب – ومالك ياخويا قلقان وخايف كدا ليه؟؟
رفع كتفه – وأنا هخاف ولا هقلق ليه؟ مش عايز أعرف.
قالها وخرج وهي فضلت باصة لمكانه وعقلها بيجيب ويودي..
اما على السلم، كان باسل شال حورية وطلع بيها بيتهم بسرعة، كانت بتعيط من الوجع ومن الذل اللي شافته.
حطها على السرير وقال وهو بيطبطب على ضهرها – إي اللي وجعِك؟ تلبسي وننزل لدكتور؟
ب
بصتله – قلبي…
بصلها بعدم فهم فكملت – قلبي اللي واجعني يا باسل، أنت عارف أنا وقعت إزاي؟
انتظر بترقب باقي كلامها فقالت وهي بتعيط – بثينة زقتني من على السلم وقبلها اتخانقت معايا…
سكتت لثانية ورجعت كملت – باسل أنا تعبت والله، مش معقول كل دا عليا ولسة مكملتش شهر!
كان بيسمعها بعصبية مبنتش غير في عروق رقبته البارزة، قام وقف وهو مكور إيده فوقفته بسرعة – رايح فين؟
– نازل أفهم هي عملت كدا لي!
ابتسمت – أنت فاكر إنها هتقولَك إنها عملت كدا؟ أبسط حاجة هتقولَك إني كذابة، وبما إن محدش بيطقني هنا كله هيصدقها!