قطعتها أسماء وقالت : مفيش بس أنا هنا ماما وليكي أوضة وإتعاملي كإنك في بيتك إتفقنا ؟
بصتلها ريناد ومتكلمتش ، طبطبت علي خدها وقالت : متقلقيش يا حبيبتي والله من حاجة أنا دايماً جمبك ، أوكيه ؟
إبتسمت ريناد وقالت بإحراج : أوكيه
باست أسماء راس ريناد وقالت : تاكلي ؟
هزت ريناد راسها يمين وشمال وقالت : عايزة أنام بس
قالت أسماء بعد ما شاورت للخدم : طب يا حبيبتي أنا هخلي أوضتك جمب أوضتي علشان لو إحتاجتي حاجة
قرب واحد من الخدم ، قالت أسماء : خد الشنط وحطها في الأوضة الفاضية اللي جمب أوضتي
هز الخادم راسو بإحترام وأخد الشنط وطلع علي فوق
قامت ريناد مع أسماء وطلعو علي السلم
كل دا وكان داغر واقف مربع إيديه وباصصلهم بِملل
طلعت ريناد مع أسماء الأوضة ودخلتها أسماء وقالت : أوضتك أهي وأوضتي أنا جمبك لو إحتاجتي أي حاجة في أي
وقت تعاليلي ومتفكريش ثانيه إتفقنا ؟
هزت ريناد راسها وسكتت ، طلعت أسماء مع الخادم وفضلت ريناد تتفرج علي الأوضة وبعدها ظبطت هدومها في الدولاب ودخلت أخدت شاور وطلعت لبست إسدال الصلاه وصلت ومسكت المصحف فضلت تقرأ فيه وهي بتعيط