‘ كل شيء صعب هيعدي بعدين انت اقوى واحد في الدنيا… انا عارفة كده كويس ف ميهمكش حاجة… و ارجع اضحك من قلبك تاني
بصلها بزعل و الدموع في عيونه
” مش قادر… والله ما قادر !!
– لا هتقدر اضحك بقى و فُك شوية و عيش حياتك على طبيعتك انت مش على طبيعة الظروف… انت معاك دفعة بحالها و نجحني في الامتحان والنبي عشان يرضوا يفسحوني في دريم بارك
ابتسم سيف و قالها
” انتي الوحيدة اللي بتخليني اضحك من قلبي بجد
‘ يعني كده هاخد امتياز صح ؟
ضحك سيف و قال
” كده كده هتاخدي امتياز بمجهودك أنا متاكد من كده… المهم خليكي معايا شوية كمان
مسكت سيلين منديل ومسحت دموعه بأيدها و قالت
‘ انا معاك اهو متقلقش
فضل يبصلها في عيونها و هو مبتسم
رن تليفونه…. بص ناحيته و رجع يبصلها لكن مش لاقيها… فضحك و قال
= حتى و انتي في خيالي بتخليني اضحك من قلبي… فيها ايه لو كنتي مثلا زميلتي ايام الجامعة مش طالبة عندي… كانت ساعتها هتتغير حاجات كتير اوي… كان زمانك هنا معايا فعلا مش مجرد هلوسة من دماغي….