” قبل ما نبدأ حياتنا الجديدة… عايز نتفق اتفاق صغير
‘ ايه هو ؟
” بصي… عايز نتفق سوا إن اي حاجة يعملها الطرف التاني.. سواء أنا أو انتي… نصارح بعض فورا… أنا مش عايز نكتم جوانا… ياريت
تقولي في ساعتها على اي حاجة عملتها و ضايقتك… و اي مشكلة تحصل ياريت منكبرهاش و نحلها سوا… اتفقنا ؟
قولت بفرح
‘ اتفقنا…
” لحظة اقوم اجيب حاجة عايز اوريهالك… لازم تشوفيها…
قام و طلع على الصالة… أنا بحب في سيف انه صريح أوي… و بيحب الكلام المباشر… و بيعرف يحل اي مشكلة حصلت ما بينا… وصلت رسالة على تليفوني… قولت مين بعت دلوقتي… ما كله عارف إن فرحي النهاردة… مسكت التليفون و شوفت الرسالة… فضلت متنحة
شوية… و بعد كده قفلت التليفون… جه سيف و معاه طبق… قعد جمبي و قال
” حبيت اختم اليوم ب حاجة بتحبيها…
‘ فراولة !!
مجرد ما شوفتها بدأت أكل فيها… سيف اكلني بإيده و كان مبتسم بطريقة بتخبيني اقع في غرامه أكتر و أكتر… قعدنا نحكي و ناكل سوا… خلصنا الطبق… سيف قرب مني و مسك خصلات شعري و بيشمها و قالي بهمس
” سيلين… أنا بحبك أوي… أوي