” ليه هتغيريه ؟
‘ يعني الرقم ده آسر بيتصل عليا منه… عملتله بلوك بس رجع اتصل من رقم تاني… ف الحل إني اغيره…
” رديتي عليه ؟
‘ لا طبعا… و لو عايز تتأكد خُد تليفوني و شوف بنفسك… اه صح تليفوني مش معايا… مع هدير… يا هديييررر
” خلاص يا سيلين مصدقك والله…( بصلي في عيوني ) أنا واثق فيكي طبعا… و اعملي اللي يريحك… لو عيزاني اشتريلك خط جديد دلوقتي… انزل اشتري
‘ لا مش دلوقتي… بكره كده لما انزل هشتري
بَص سيف السماء و قال
” يارب سرع الأيام اللي جاية عشان نتجوز و نبقى مع بعض… قولي يارب يا سيلين
ضحكت و قولت
‘ يارب
بدأت فترة خطوبتنا و دي كانت أحلى ايام اعيشها… سيف غير في حياتي حاجات كتيير اوي… وجوده خلاني اسعد بنت في الدنيا كلها…
دايما يسأل عليا… خصصلي يوم الخميس نخرج فيه سوا… كنا بنخرج نقعد بره… ساعات ناكل او نشتري هدوم او نتمشى سوا… و كنا بنخطط لجوازنا وحدة وحدة مع بعض… سيف محسسنيش خالص بالوحدة… سيف بقا جزء رئيسي في حياتي… اتعلقت بيه أكتر و حبيته أوي… علمنا ذكريات بالكوم في الفترة دي… ذكريات عمري ما هنساها و هتبقي محفوظة جوه قلبي دايما…