” ايه اللي يتحل بالظبط ؟ احنا مفيش بينا حاجة عشان تتحل اصلا… أنا هنام…
* طب تعالى نام جوه…
” لا… الصالة عندك جوها حلو…
* ماشي… هجبلك بطانية عشان تتغطى و تنام كويس…
مصطفى جابله بطانية و رجع على اوضته… سيف اتغطي كويس بس مش عارف ينام… فتحت تليفونه على صورة سيلين… بيعمل زوم على الصورة و بيتأمل فيها… فجأة فاق من سرحانه و مسح كل صورها اللي عنده… و حط التليفون تحت المخدة و نام
تاني يوم…..
سيف كان بيتقلب على الكنبة… فتح عيونه… لقي الشمس طلعت… قام غسل وشه… رجع على الكنبة و قعد… مسك تليفونه… كان هيرن على سيلين بس اتراجع…
” مش كل مرة انا اللي اسأل… هي مش بتفتكرني برنه وحدة حتى… يبقى ليه ارن انا عليها ؟
صحي مصطفى و شاف سيف
* معقولة صحيت… ده الساعة لسه 8 الصبح…
” طب ما انت صحيت اهو…
* لا انا صاحي اروح الحمام و اكمل نوم تاني… ابقا اصحى على 11 كده
ضحك سيف و قال