– اتفضلي يا أمي كل عام وإنتِ بخير.
وضع بحجرها ظرف قماشي ناعم جميل به مبلغ مالي بسيط.
قبلت رأسه وقالت:-
– مش هتبطل الخصلة دي خالص..
–
ربنا يرزقني وأزودها كل عيد يا غالية دا أفضالك عليا مايسدها مليون شبه دول، فضلك لا يوافى يا أمي.
– يزيدك يا عُدي ويرزقك رزق حلال طيب، يارب أنا قلبي راضي عن عُدي ابن بطني ورزقك ليا .. ارضى عنه يا كريم.
– إللي قولتيه ده الدنيا وما فيها يا أمي.
– يسعدك يا عيون أمك.
– احممم أمال غصون فين..
ابتسمت وقالت:-
– دخلت تعمل شايّ هتلاقيها جوا وناولني التلفون بتاعي أكلم خالتك فراولة.
– ماشي يا أمي .. اتفضلي وأنا هشوف غصون كدا..
سار نحو المطبخ ودخل بهدوء ثم فجأة احتضنها من الخلف بحنان..
– عُدي … حضتني يا حبيبي.
– لا.
– لا .. أيه!
– مش اتخضتي.
– عرفت منين.
– عارف إنك بتحسي بيا وبتشمي ريحتي من على بُعد.
– ونسيت إن قلبي بيدق وكأنه بيقولي عُدي جه.