دقائق ولقيت نيره ورايا، اللي جت بحجه إنها هتشرب مايه، بصيتلي بسخريه وابتسمت ابتسامه سخيفه
وقالت: يمكن أحنا بنتعامل زي الأخوات آه، بس الأكيد إنكم مش أكتر من أخوات وإنتِ فاهمه كلامي كويس.
انهيت كلامها بغمزه ساخره وخرجت، حقيقي مقدرتش أمسك نفسي من الضحك، بس تداركته إنه ميوصلش لهم
برا،
مخدتش وقت عشان أفهم إنه حاكي ليها على الإتفاق اللي بينا، وهي في نظرها كده إنها كسبت الحرب اللي اشتغلت ما بينا من ساعة ما دخلوا البيت، آه من ساعة ما دخلوا البيت إيه، من ساعة ما اتجوزنا أنا وهو،
حالة من الضحك الغريب اتملكتني، ضحك بيخبي الغضب اللي عايز يطلع،
اندهاشي منه مكانش غير إنه بيزيد،
فضلت على حاله الضحك فترة خمس دقائق كانت عيني دمعت فيها وكأنها كانت بتهيأ نفسها عشان تبكي، مسحت الدمعة اللي فرت بسرعه، غسلت وشي، وقفت دقيقتين جمعت فيهم نفسي، وخرجتلهم ولا كأن حاجه حصلت أو بتحصل، نفس الإبتسامة العفوية، قدمت لكلهم العصير ورجعت تاني لمكاني، كانت ندى جمعت الشباب
واتجهنا للانتريه قدامهم عشان يلعبوا سوا.
فضلت قاعدة مع خالاته كانوا لُذاذ جدًا بصراحه وحديثهم جميل، مقدرتش اسيب الجمال ده عشان أقعد في وش ندى،