– اتمنى تفضلي على موقفك
ليدخل جدهم في تلك اللحظة مقاطعاً حديثهم قائلا :
– عاملة ايه يا كوكي؟
– الحمدلله يا جدو اتفضل
– ينفع تسيبيني معاها شوية يا فاتن
حذرته فاتن قائلة:
– جدو لو سمحت ماتقولهاش ترجع للي اسمه سامج ده وعيلة السماح
– معلش يا فاتن سيبينا شوية بس يا حبيبتي انا عايز اتكلم معاها وافهم دماغها ايه
زفرت بحنق وهي تخرج لتتركهم سوياً:
– طيب
– سامح راح لعمك بيشتكيله أننا رافضين نرجعك وانك عايزة تتطلقي
– ما احنا فعلا هنتطلق يا جدو
– بس برضو يا كاميليا في بنت جاية في السكة.. انتي خلاص اتأكدتي انها بنت مش كده ؟
– اه الدكتور قالي طلعت بنت
زفر الجد بحزن:
– يعني هتتربى بعيد عن ابوها !
ردت بلا مبالاة :
– تتربى يا جدو… تتربى بعيد عنه احسن بكتير
– بس انتي كده يا بنتي هتخسري كتير وهتشيلي حمل كبير لوحدك
– احسن ما اضيع عمري كله مع الشخص الغلط…خسارة قريبة
نحن لا نرضى بالقليل اما ان نكون او لا نكون
فـ بعض الخسائر أحياناً تكون مكسب
الخسارة التي تخسرها من اجل راحتك هي ليست بخسارة !
هي تعبت…تعبت من البقاء في المكان الخطأ
_____________