رددت بحزن :
فريدة بتقول انه محتاجني
تنهد مردداََ بحدة :
سفيان مش محتاجلك ، علطول بايعك اشتري نفسك مرة يا بنتي و بطلي تجري وراه طول ما هو شايفك كده
هيدوس عليكي اكتر و اكتر
اخفضت وجهها مرددة بحزن :
خدعوه و خلوه يكرهني
رأفت بحدة و غضب :
كل واحد عنده عقل يحكمه هو كان عنده استعداد للكره بِعد عن الكل و أولنا انتي كأنه ما صدق
ميان بحزن :
بس هو ابن خالتي في الأول و في الآخر
رأفت بتهكم :
ياريته هو كان راعى صلة القرابة دي سفيان و كاميليا نسخة من بعض بيدوسوا ع الكل
ثم تابع بحدة و صرامة :
لو انتي مستغنية عن نفسك و عايزة ترميها في النار انا بقى مش مستغني و مش سفيان اللي اسلمك ليه في يوم
من الأيام ، كرامتك فوق كل حاجة و لو مش فارقة معاكي هي فارقة معايا انا ولو انتي عايزة تقللي من نفسك ابوكي مش هيقبل كده طول ما هو عايش اللي ياخدك يشيلك فوق دماغه مش بس كده يحطك جوه عينيه تكوني مقامك عالي عنده و يكون شايفك غالية ، لكن سفيان مش كده سفيان شايفك اقل منه و كارهك يا بنتي مش شاريكي
ميان بدموع و حيرة و تشتت :
انا تعبانة يا بابا كنت خلاص قولت هطلعه من دماغي و هكمل حياتي من غيره بس بعد كلام فريدة ليا في المستشفى رجعت فكرت تاني و رجعت احط مبررات انا عايزة انساه يا بابا ابعده عني انا بكره ع اللي بيعمله فيا و بكرهه عشان بحبه و هو ميستاهلش
جذبها رأفت لاحضانه و هو يشعر بالعجز و هو يراها تتألم هكذا و لا يعرف كيف يخفف عنها تمنى ان يكون ابنه على قيد الحياة ليسانده و يخفف عنه أعباء الحياة و يرشده كيف يتصرف ، ردد بدعاء :
الله يرحمك يا بني و يهديكي و يصلح حالك يا بنتي
……..