صحيت غرام من النوم على رنة الفون بصت في الساعه كانت 10 مسكت الفون وردت
جنات / ايه يا غرام برن عليكي من ساعتها مبترديش ليه
غرام / يعني بترني ومبردش ابقى أكيد نايمه يبقى نخلي عندنا دم ونحس على دمنا شويه ونسيب الناس نايمه
جنات / والله يا شيخه انتي اللي معندكيش دم روان عملت حادثه امبارح ومجبسه رجليها هتيجي نروح نشوفها
غرام بخضه / ايه ده عملت حادثه ازاي يعني
جنات / مش عارفه بس أنا بكلمها من شويه قالتلي انها عامله حادثه
غرام / خلاص هقوم أقنع بابا اني أروح أنا وانتي ليها سلاموز
جنات / سلام
قامت غرام لبست اسدالها وخرجت ملقتش حد في الشقه خالص فتحت باب الشقه سمعت صوت جاي من السطح دخلت تاني اتوضت وصلت وعملت ساندوتش وأكلته وطلعتلهم على السطح وهي بتفكر هتفنعهم ازاي لقت علي ورسلان قاعدين بيتكلموا وباباها ومامتها وإلهام وسيردار قاعدين مع بعض وبيضحكوا
غرام وهي بتغني / الضحكه دي يا ناسو كوتي كوتي يا خلاثو
الكل ضحك عليها
غرام وهي بترفع ايدها اليمين جنب راسها / صبح صبح ياعم الحاج
وراحت عند باباها جري / بابا حبيبي بابا الغالي أعملك شاي يا بابا
الأب وهو بدأ يفهم هي بتعمل ايه بصلها وهو بيضيق عيونه / لأ
غرام / طب أعمل تاكل
الأب / لأ
غرام/ أكويلك جلابيه وقميص وبنطلون يا حبيبي
الأب / غرام هاتي من الآخر وقولي عاوزه ايه الدخله دي مش عليا