_ لا هتقف يا عاصم، يعني الفستان كان معدي ال٧٠٠٠ عشان براند، ده مبلغ مش قليل اكيد كان هيفرق معاك.
تنهد بهدوء قبل أن يقول بصدق:
_ وأنا مقدرش اشوف نفسك في حاجة وأجلها، حتى لو الحاجه دي مش ضرورية، مادام عينك حبتها خلاص لازم تبقى عندك.. وبعدين مش يمكن ربنا يراضيني زي ما راضيتك وييسرلي أموري!
تهاوت دموعها بتأثر بحديثه وموقفه وضغطت على شفتيها بقوة كي لا تنخرط في البكاء الآن، ليغمض هو عيناه بيأس ثم فتحهما يقول:
_ في ايه يا ريهام! في ايه يا حبيبتي أنتِ بقيتِ حساسة كده ليه! من كتر ما بقيتِ تعيطي مبقتش عارف أنتِ كده فرحانه ولا زعلانة.
مسحت دموعها بكفيها وهي تردد بغمغمة:
_ لا أنا كدة متأثرة، وفرحانة برضو.. بعدين معرفش بقى من ساعة ما ولدت وأنا أقل حاجة بتأثر فيا.
اقتربت الخطوة الفاصلة بينهما تحتضنه بقوة بعدما وضعت الحقيبة جانبًا وقالت:
_ ربنا ما يحرمني منك يا عاصم، أنا بحبك أوي.
أحاطها بذراعه الحر حيث يحمل طفله على ذراعه الآخر، وابتسم بحب:
_ ولا يحرمني منكوا يا حبيبتي، أنا اي حاجة بقيت بعملها في حياتي عشان أسعدكوا وفرحتكوا عندي بالدنيا.
أغمضت عيناها وهي تريح رأسها على صدره وقالت براحة تأتي من أعماق قلبها:
_ كل يوم بتأكدلي إن اختياري ليك كان أكتر حاجة عملتها صح في حياتي، بحمد ربنا أن رغم كل الي حصل بينا كان مكتوبلنا نكمل.. رغم الغلط والذنوب الي ارتكبناها بس ربنا كان رحيم بينا وكتبلنا أننا نكمل سوا.. الحمد لله.
قبل أعلى رأسها وهو يؤكد على حديثها بتنهيدة من أعماقه:
_ الحمد لله.
وكان الحمد لله.. الحمد لله على الصحوة مبكرًا قبل فوات الأوان، الحمد لله على رحمته بنا رغم أخطائنا الفادحة، الحمد لله على تطيبه لقلوبنا واختياره لنا ما فيهِ خيرًا لم نكن ندركه.
________________