– غضب عني يا يوسف والله, حاسة إن مفيش حتة في جسمي سليمة.
أمسك كفها يشد عليهِ كأنه يساندها وقال:
– عارف يا حبيبتي, بس برضو لازم تقاومي, أنتِ بقالك أربع أيام على الوضع ده وشكلك مُرهق خالص مينفعش كده.
فتحت عيناها بضعف مرةً أخرى وغمغمت بتعب:
– أنا أسفة, عارفة إني متقلة عليك اليومين دول عشان شغل البيت, كفاية إنك بترجع من الشغل تطبخ وتنضف.. أنا والله لو اقدر كنت قمت عملت أنا شغل البيت بس لما بقف بدوخ و…
قاطعها بضيق حقيقي:
– في ايه يا صفية هو كل يوم نفس الأسطوانة دي؟ هو انا اشتكيتلك يا ستي؟ بعدين أنتِ شايلة البيت السنة كلها, مش هيجرى حاجة لو شيلته أنا كام يوم ولا شهر حتى! وبخدم مين في الأخر, أنا وأنتِ وابني وأمي, يعني مش حد غريب, متكبريش الموضوع.
انهى حديثه ونهض تحت أنظارها متجهًا لطاولة صغيرة بمنتصف الغرفة كان قد وضع عليها صينية الطعام سلفًا, فجذبها وعاد إليها جالسًا فوق الفراش أمامها بعدما وضع الصينية فوق قدمه وقال:
– يلا بقى عشان تاكلي, في أدوية مهمة لازم تاخديها.
اعتدلت بصعوبة وفقط رفعت رأسها على الوسادة بتعب ظاهر, فاقترب هو منها أكثر وبدأ في إطعامها وسط تزمرها من وقت لآخر ليتوقف وإصراره على تكملة الوجبة, حتى انتهيا أخيرًا فأعطاها الدواء لتعود للانسحاب بجسدها للأسفل ووضعت رأسها فوق الوسادة مغلقة عيناها بتعب, فشعرت بهِ ينهض من فوق الفراش ثم شعرت
بشفتيهِ تطبع قبلة عميقة فوق وجنتها قبل أن يبتعد مغلقًا إضاءة الغرفة خلفه, فتحت عيناها في الظلام ورغم انعدام الرؤية ظاهريًا إلا أنه في الحقيقة تشعر أنها الآن ترى أفضل من أي وقت مضى, كيف للإنسان أن يسعى وراء سراب فيخرب بيده أشياء يملكها, ويفقد لذة امتلاكها!؟