_ ما نستجوب ال٣ الي في البوكس بره.
أجابه “حازم” ساخرًا:
_ نستجوب ايه؟ دول عاوزين ولا يومين عشان بس يفهموا احنا بنسأل على ايه! مفيهمش حتة سليمة يا بني.
وفي أثناء حديثهما استمعا لصوت طلقات نارية تأتي من مكان مجهول..
_______________
ذكر ربه في سره عدة مرات ليهدأ قليلاً ويجيب على حديثها بكلمات منمقة لا تزيد من اشتعال الأجواء بينهما، وما إن شعر بذاته قد هدأ حتى سألها مستنكرًا:
_ هو ايه يا صفية الي الحب هيضيفه زيادة في علاقتنا؟ احترام، مودة، كلام حلو، احتواء، أني أكون شايفك أحسن وأجمل ست في الدنيا، عيني متنبهرش بغيرك، اتمسك بعلاقتنا مهما حصل.. كل ده بيحصل أصلاً! يبقى ايه الي ناقصك بجد، عشان تنكدي علينا حياتنا كده؟
أجابته باصرار على موقفها:
_ ناقصني أحس إني الوحيدة الي هنا.
قالتها وهي تشير لقلبه، ليبتسم ساخرًا يقول:
_ وطبعًا عقلك مصورلك إن شيرين هي الي هنا مش كده؟
أجابته بحقيقة تقرها:
_ لو مكانتش هنا، كان زمانك حبتني.
_ تعرفي طول الشهور الي فاتت الي بعدنا فيها عن بعض فكرت كتير اوي في الموضوع ده.. ووصلت لمبرر يمكن يكون مقنع..
تنهد بقوة زافرًا أنفاسه المحتبسة قبل أن ينظر لها وهو يقول: