= لا انا مش عاوزه أئذيه ..انا هسمع كلامك وهنفذ كل الي تقوليه بس المهم يبقى كويس
الطبيبه بابتسامه حانيه وهي تمرر الجهاز بهدوء على بطنها
= طب بصي كده على الشاشه الي جنبك ..شايفه النقطه الصغيره دي ..دي بقى تبقى البيبي وعمره دلوقتي
خمسين يوم
نظرت زهره للشاشه بسعاده ودموعها تتساقط مره اخرى وهي تشاهد بداية تكون طفلها بداخل رحمها
لتربت الطبيبه على كتفها بتعاطف وهي تمسح بطنها من بقايا الجل الموجود عليه
و تقول بجديه
= كفايه دموع واسمعيني كويس.. انا هديكي شوية ارشادات وادويه طبيعيه هتساعدك انك تعدي الفتره الاولى من الحمل من غير تعب وطبعا هتابعي معايا طول فترة الحمل
لتستمع لها زهره جيدا وهي تبتسم بسعاده وهي تتخيل رد فعل سيف على خبر حملها
انتهت زهره من زيارة الطبيبه وهي تشعر بسعاده طاغيه لتشعر انها تريد ان تخبر العالم كله بخبر حملها وأولهم
سيف لتحاول الاتصال به للمره العاشره
ولكنها لم تنجح في الوصول اليه لعدم وجود تغطيه جيده للتليفونات المحموله في المكان المتواجد به
لتتنهد بضيق ثم تقول بسعاده
= مش مهم هو قالي انه هيختصر اجتماعته وهيخلصها في يوم واحد يعني على بكره الصبح بالكتير هيكون هنا
دخلت زهره الى بهو الفيلا وهي تبحث عن سالي بعينيها لتجد ألفت تقف في أخر البهو توجه خادمه لتنظيف المكان
لتنطلق زهره اليها تحتضنها بسعاده وهي تقبل وجنتها وتدور بها بفرحه وهي تقول وعينيها مدمعتين بدموع الفرح
= باركيلي يا مدام ألفت أنا حامل
شهقت ألفت وهي تضم زهره بسعاده
= مبروك يا زهره هانم انتي انسانه طيبه وتستاهلي كل خير