-“غريبة أوي يعني، إيه اللي خلاك تقرر تقلب كده فجأة على عزام ومهاب للدرجة اللي وصلتك أنك تطلب مني المساعدة عشان أدمرهم مع أن أنت بنفسك اللي كنت بتمنعني عنهم؟!”
اعتدل مختار في جلسته وتحدث باستياء وهو يتذكر كل كلمة قالها رامز عندما كان في مكتبه:
-“السبب مش هيفيدك كتير يا مهران أكتر من أن سوق الأسلحة والمخدرات هيكون فاضي قدامك بعد ما نخلص من عزام وأظن أن دي هي الفرصة اللي أنت مستنيها بقالك سنين طويلة والمرة دي أنا مش همنعك بل على
العكس هشجعك وهكون في ضهرك ولكن بشرط أنك تضمنلي أن عزام يقع وميقدرش يقوم نهائي”.
ضحك مهران بشدة وهتف بسخرية بعدما حك ذقنه متصنعا التفكير:
-“خليني كده أخمن، معقول يكون السبب اللي خلاك عايز تخلص من عزام بعد السنين دي كلها هو أنك حاطط عينيك على مراته؟!”
استكمل مهران كلامه بعدما عاد لوصلة الضحك مرة أخرى:
-“هو بصراحة البنت فعلا حلوة وتخلي الواحد يعمل أي حاجة عشان تبقى ليه بس عمري ما كنت أتخيل أنك
تضحي بعزام عشانها”.
نفى مختار جميع الأفكار التي تدور في رأس مهران وقرر أن يشبع فضوله ببعض المعلومات حتى يتوقف عن التكهن بأمور ليس لها أساس من الصحة:
-“عندك حق داليا فعلا تستاهل كتير بس أنا أخري معاها أتسلى شوية كنوع من التغيير مش أكتر ومستحيل كنت
أضحي بعزام عشانها بس الموازين كلها اتغيرت دلوقتي بعد ما اكتشفت أنه غدر بيا واتسبب ليا في مصيبة لسة لحد دلوقتي بعاني من توابعها وعشان كده قررت أنتقم منه بأني أدمره ومش بس كده ده أنا كمان هاخد منه داليا وأحسره عليها”.