-“طيب والمطلوب مني إيه؟”
-“المطلوب منك أن لو عندك أي معلومات أو وصلت لأي حاجة عن عزام تتصل بيا وتبلغني وده الكارت بتاعي اللي فيه رقم تليفوني”.
قالها وسام ومد يده بالكارت ووضعه أمام رامز ثم انصرف تاركا له الفرصة في التفكير وهو يعلم جيدا أنه سيوافق على فكرة الاتحاد.
-“أنت سرحان في إيه يا رامز؟”
انتشل صوت وسام رامز من شروده فرفع رأسه متسائلا بفضول:
-“فيه سؤال بيدور في دماغي من ساعة ما شوفتك يا سيادة المقدم وهو أنت ليه عايزني أساعدك وأقولك على أي معلومة أوصلها وأنت أصلا ظابط مباحث وسهل جدا تجيب معلومات عن عزام؟!”
أجاب وسام وهو يشعر بالحزن الشديد بسبب الفساد الذي انتشر حوله في كل مكان وتوحشت أنيابه:
-“لأن عزام للأسف ليه عيون في الشرطة والعيون دي أنا مش عارف عنها أي حاجة، وكل ما بتوصل ليا معلومات عن مواعيد تسليم المخدرات هو بيعرف وبيلغي كل حاجة وعشان كده أنا مش قادر أقبض عليه رغم أني عارف أنه
مجرم وأنه المسؤول عن حرق مخزنك وموت حراسك والمفروض يتعدم بس مفيش ولا دليل ضده”.
أومأ رامز بتفهم مخبرا وسام باستنتاجه لمعنى حديثه:
-“أنا فهمت دلوقتي، أنت عايز يكون ليك مصدر تاني للمعلومات بعيد خالص عن التحريات اللي بتعملها داخل إطار
شغلك وفي نفس الوقت أنت عايز تضمن أن المصدر ده يكون موثوق فيه وعشان كده قررت تستعين بشخص عنده عداوة مع عزام وعايز يقضي عليه”.
أكد وسام هذا الكلام بقوله:
-“بالظبط كده، أنا اتأكدت بعد مرات كتير من الفشل أني مش هقدر أقضي على عزام غير لو اتعاونت مع شخص بيكرهه وعنده نفس الهدف”.
لمعت عينا رامز ببريق الانتقام وهو يهتف بعزم وإصرار: