-“هل سبب حزنك متعلق بابنك اللي طليقتك مانعاك تشوفه ولا فيه حاجة تانية غير الموضوع ده؟”
وضع رامز كفه أسفل ذقنه ومط شفتيه بعدما قال:
-“أنا زعلان أوي على أمي، هي أكتر شخص ساندني في محنتي ومش طلبت مني غير مقابل واحد وهو أني أفرحها وأتجوز مرة تانية”.
سأله الطبيب مستغربا حزنه من هذا الأمر:
-“طيب وإيه المشكلة في الموضوع ده؟!”
أجابه رامز بصراحة كاشفا عما يدور بداخله:
-“المشكلة هي أني مش طايق الفكرة دي من الأساس، تقدر تقول أن من ساعة ما داليا غدرت بيا وحرمتني من ابني وأنا كاره كل الستات وشايف أنهم انتهازيات زي داليا أو طيبين لدرجة غبية زي نادين وأنا مش عايز أرتبط بواحدة وأسيبها زي ما عملت قبل كده في بنت خالتي أو أطلع عليها عقدي لو كملت معاها واتجوزتها”.
حرك الطبيب القلم الذي يمسك به في يده بحركات دائرية فوق ورقة بيضاء موضوعة على سطح مكتبه قائلا:
-“أفهم من كلامك يا رامز أن والدتك عايزاك تتجوز وتنسى اللي حصلك من داليا بس أنت رافض فكرة الارتباط وده عامل مشكلة بينك وبينها”.
أومأ رامز قائلا بوجوم ارتسم على وجهه بعدما تذكر نظرات العتاب التي رآها في عيني والدته قبل مغادرته المنزل