محاولة لتزييفها:
-“بصي يا طنط جميلة، الطلاق حصل أثناء فترة كتب الكتاب وده معناه أن الزوجة اللي بيتم تطليقها ملهاش عدة أصلا ولو الزوج ندم على قراره وحب يردها فلازم يتجوزها مرة تانية بعقد ومهر جديد وده اللي مراد كان لازم يعمله
عشان يرجع سمية لعصمته”.
استكمل آدم حديثه بعدما ضرب حافة المقعد العمومي الذي يجلس عليه:
-“لما بيحصل طلاق بين زوجين أثناء فترة كتب الكتاب وقتها الزوجة بيكون من حقها تاخد نص المهر اللي هو في العُرف بتاعنا يبقى الشبكة وواجب عليها ترد النص التاني لجوزها والحقير القذر اللي اسمه مراد كان عارف أنه هيضطر يجيب شبكة جديدة بعد ما يسترد نص الشبكة القديمة وهيضطر يكتب مقدم ومؤخر جديد غير القديم
وعشان كده هو سكت واستغل أن الطلاق كان غيابي وأن مفيش أي إخطار من المحكمة وصل لسمية بخصوص موضوع الطلاق وده أصلا لأنه كان كاتب عنوانها غلط وكمل معاها ودخل بيها وهي أصلا مش مراته”.
لطمت جميلة خديها وهي تصرخ بذهول محاولة إخراج الكلمات من بين شفتيها:
-“يا نهار أسود ومنيل، عشان كده الواطي هرب برة البلد أول ما إحنا طلبنا منه أنه يجيب المأذون ويطلق سمية قدامه، أتاريه كان عارف أن عملته المهببة هتتكشف بمجرد ما المأذون يروح المحكمة عشان يوثق الطلاق”.
هتف آدم وهو يكز على أسنانه وسط حالة الغيظ التي يشعر بها بسبب عدم تمكنه من الإمساك بمراد ودق عنقه:
-“لو كانت سمية راحت السجل المدني بعد رجوعها من رحلة شهر العسل عشان تغير الحالة الاجتماعية في بطاقتها من آنسة إلى متزوجة وقتها كانت هتكتشف الموضوع وساعتها كنت هقدر أحاسب مراد على اللي عمله لأنه كان هيبقى موجود قدامي هنا في البلد بس الواطي خلاص سافر وزمانه دلوقتي عمال يتريق على أهل
العروسة اللي قدر يغفلهم ويضحك عليهم”.
نظرت جميلة حولها بضياع واتسعت، عيناها بشدة بعدما رأت سمية تقف خلفها ويبدو من ملامحها أنها قد سمعت كل كلمة وعلمت أنها قد تم التلاعب بها واستباحة شرفها.