-“يعني أنت عايزني أعملك إيه بالظبط يا رامز؟! أنا روحت اتكلمت مع داليا وهي مصممة على الطلاق ومش راضية تتراجع عن قرارها وأنا مقدرش أغصبها على حاجة هي مش عايزاها”.
تحدثت إلهام بأسف موجهة كلامها لمحسن وهي تربت على كتف ابنها حتى يهدأ ولا يقوم بارتكاب أي حماقة:
-“معلش يا محسن حاول تتكلم معاها مرة تانية وخليها تفكر في ابنها اللي هيفضل طول عمره محتاج لوجود أبوه جنبه زي ما هو محتاج لوجودها هي كمان”.
قال محسن بعدم اكتراث وهو ينهض:
-“حاضر، أنا هتكلم معاها تاني وهحاول أقنعها بأنها تعيد النظر في موضوع الطلاق”.
غادر محسن تحت نظرات أمنية التي كانت ترمقه بسخط طوال الجلسة؛ لأنها تدرك حقيقة عدم اهتمامه بأمر انفصال داليا عن رامز التي يبدو من خلال تصميمها على فكرة الطلاق أنها وجدت الرجل البديل الذي سيجعل
حياتها أفضل بكثير مما هي عليه الآن.
تمتمت أمنية بغيظ وهي تغلق الباب خلف محسن:
-“روح يا شيخ ربنا ينتقم منك أنت وأختك، أنا كان عندي حق لما قولت عليكم عيلة مقرفة وحقيرة”.
عادت أمنية إلى غرفة الصالون ونظرت إلى شقيقها بحزن وهي تقول بنبرة آسفة على ما جرى معه نتيجة عناده
وتجاهله لنصائحها وتحذيراتها بشأن زواجه من داليا:
-“واضح يا رامز أن محسن مش مهتم أصلا بالموضوع والظاهر كده أن داليا خلاص استكفت منك وشايفة أنك
خلاص مش هتقدر تعيشها في مستوى كويس بعد الأزمة اللي حصلت معاك”.
أيقظت كلمات أمنية البركان الخامل في قلب رامز الذي قرر أن يستعيد كل شيء منحه لداليا حتى لو كانت حياته هي الثمن الذي سيدفعه من أجل تحقيق هذا الهدف.