-“تمام يا قلبي، روحي ارتاحي شوية وأنا هبقى أصحيكِ عشان تذاكري”.
▪▪▪▪▪▪▪▪▪
ابتسم مراد بشدة بعدما تلقى اتصالًا من أحد أصدقائه الذين يعملون في دول الخليج وقد أخبره صديقه أنه قد
نجح في إيجاد وظيفة مرموقة من أجله وبراتب يعادل أضعاف الراتب الذي يتحصل عليه من عمله الحالي.
هتف مراد بامتنان شديد، وهو ينظر بغيظ نحو صاحب الشركة الذي يقف بعيدا عنه:
-“أنا مش عارف أشكرك إزاي يا رؤوف، أنت بجد قدرت تعمل معايا معروف كبير عمري ما هقدر أنساه”.
هتف رؤوف بجدية شديدة:
-“أهم حاجة دلوقتي هي أنك تجهز الأوراق بتاعتك وتعمل جواز سفر وتظبط أمورك عشان أنت لازم تيجي تستلم الوظيفة في أسرع وقت ممكن وبالنسبة للكفيل بتاعك فأنا مش عايزك تقلق من ناحيته لأنه راجل محترم جدا
وبيني وبينه عيش وملح وهو بيحاول بقاله فترة طويلة أنه يخدمني”.
زرعت كلمات رؤوف الطمأنينة في نفس مراد الذي عزم على تقديم استقالته من عمله الحالي بعدما ينتهي من تجهيز جميع الأوراق اللازمة التي يحتاج إليها من أجل السفر واستلام العمل الجديد.
هتف مراد بلهفة شديدة بعدما ابتعد قليلا عن مرمى نظر مديره في العمل:
-“أنا مش محتاج أعمل جواز سفر؛ لأن معايا بالفعل جواز وهو ساري وهينفع أسافر بيه، كل اللي طالبه منك هو أنك تظبطلي كل حاجة عشان أنا عايز أكون عندك خلال شهر بالكتير”.
▪▪▪▪▪▪▪▪▪