-“بصي يا أمنية، أنا مش راضية نهائي عن الموقف اللي أنتِ عملتيه في المستشفى مع داليا وعيلتها ده غير أنك تجاهلتيهم في السبوع ورفضتِ تسلمي عليهم للمرة التانية ودي تبقى اسمها قلة ذوق وأنا مش ربيتك على كده”.
أغمضت أمنية عينيها و هي تصيح بانفعال:
-“اقفلي يا ماما لو سمحتِ الموضوع ده ومتتكلميش معايا فيه مرة تانية، أنا خلاص علاقتي بداليا انتهت من اليوم اللي قربت فيه من رامز وسرقته من خطيبته وأنا مستحيل أتعامل معاها بشكل طبيعي زي ما أي واحدة بتتعامل مع مرات أخوها”.
فغرت إلهام شفتيها و هي تهمس بتأنيب:
-“ماشي يا حبيبتي، بلاش تتعاملي معاها بس على الأقل لما تشوفي أهلها تسلمي عليهم مش كل مرة تعملي نفسك مش شايفاهم لأن كده عيب يا حبيبتي”.
ازداد انعقاد حاجبي إلهام قبل أن تقول بخفوت:
-“والموضوع ده اتكرر منك أكتر من مرة وعشان كده أنا قررت أتكلم معاكِ وأنبهك للنقطة دي”.
زفرت أمنية بضيق وقررت في قرارة نفسها أنها لن تستمع إلى نصيحة والدتها فهي لن تسامح داليا أبدا مهما
حدث.
في هذه اللحظة دق جرس الباب فتوجهت أمنية حتى تفتح الباب واتسعت عيناها عندما وجدت أمامها رامزًا في حالة مزرية، فعيناه تحبسان بداخلهما الكثير من الدموع، كما أن علامات القهر ظاهرة بوضوح على وجهه.