-“شقى عمري راح يا داليا، المخزن اللي كان فيه كل البضاعة اللي استوردتها اتحرق إمبارح وكل حاجة راحت في الحريقة”.
تابع رامز بمرارة وهو بالكاد يسيطر على الدموع التي تسعى للهطول من مقلتيه:
-“أنا مش عارف أعمل إيه يا داليا، فلوسي كلها راحت في غمضة عين ومش بس كده ده كمان أنا مش هقدر أسدد قيمة القرض اللي أخدته من البنك عشان أقدر أكمل فلوس البضاعة”.
لطمت داليا خديها وأخذت تضرب فخذيها وهي تصرخ بذهول:
-“يا نهار أسود ومنيل بستين نيلة، طيب وإحنا هنعمل إيه دلوقتي وهنعيش إزاي بعد ما خلاص فلوسك راحت وكمان بقيت مديون للبنك؟!”
هز رامز رأسه قائلا بقلة حيلة:
-“معرفش يا داليا، أنا مش قادر أفكر ومش عارف هتصرف إزاي عشان أقدر أخرج من المصيبة دي”.
تساءلت داليا وهي تشعر بغضب كبير؛ لأن زوجها صار فقيرًا معدمًا بعدما كاد يصير رجل أعمال فاحش الثراء:
-“طيب وإيه اللي خلى المخزن يتحرق؟! أكيد ده حصل بسبب إهمال الحراس المتخلفين اللي أنت وظفتهم”.