فتحت عيونها بصدمه وهي بتقول بصوت عالي : اييييه؟قاسم هز كتفه وهو مكمل سواقه : اه والله..
همست بإرتباك وهي لسه مصدومه : ازاي.. و وليه؟
ابتسم براحه : مها كانت بتتابع اخبار الصفقات اللي بتدخلها عشان تكبر شغلها ، ووقع في ايدها انها دخلت شراكه مع شركه مشبو”هه في تجارة المخد”رات والآثا”ر ، ده كان من اسبوع كده.. واظن انها كانت عارفه بالموضوع ده
بس كملت فيه!
اتكلمت بإضطراب : و اتقبض عليها ازاي؟
اتنهد وهو بيبصلها بين اللحظه والتانيه : كل اللي اعرفه ان كان في شحـ ـنه هتوصل من ساعات ، والشرطه عرفت بالموضوع بس استنت كل الشركاء يتجمعوا مع بعض عشان يقسموها عليهم.. وهي كانت منهم! شافتها
الشرطه اللي كانت متابعه بيتها وهي نازله معاها شنطه كبيره فاضيه ورايحه ناحية مقر الشركه الرئيسي.. وده اللي أكد انها كانت عارفه بالموضوع ومتجرتش في الرجلين.. اتقبض عليها من 3 ساعات وهي رافضه تماماً الاعتراف وبتنكر معرفتها بالموضوع.. وإخواتها التانيين بيحاولوا يطلعوها بس هي مش بتساعدهم في ده عشان انكارها..
رمشت كذا مره وهي بتهمس : لا اله الا انت سبحانك اني كنت من الظالمين..
رفع كفها وباسه بعمق وهو بيتكلم : انا مليش دعوه بالموضوع ده عشان أفكارك بس.. انا كل اللي كنت اعرفه شراكتها في البدايه.. لكن موضوع التبليغ عنها انا مليش علاقه بيه!
بصتله بحنان وهي بتبلع ريقها بتوتر واضطراب : لا انا مفكرتش كده ابداً ، انا حاسه انها ضيعت نفسها بإيدها وحياتها اتد”مرت خلاص هي لسه صغيره.. ربنا جازاها على قد عملها.. ربنا يخفف عنها