قهقه مهران بسخرية وهتف بأسف مزيف:
-“كلامك ده مش معناه غير حاجة واحدة وهي أن عزام هو المسؤول عن الفضيحة بتاعتك مع البنت إياها، مش كده برضه؟”
أومأ مختار بخزي فتابع مهران بسعادة لأن حلمه قد تحقق وصار مختار في صفه بعدما كان بالأمس في صف عدوه اللدود:
-“تمام يا مختار، أنا أضمنلك أن نهاية عزام هتكون في أقرب وقت والمقابل هو أنك تستغل نفوذك في تسهيل دخول الشحنات بتاعتي للبلد من غير ما الأمن يشم ريحة الموضوع، أنا عايزك تعمل المستحيل عشان أضمن أن اللي حصل زمان مع عاطف الشناوي ميتكررش تاني مهما حصل”.
مد له مختار يده قائلا بجدية:
-“تمام يا مهران، إحنا كده اتفقنا”.
وضع مهران يده في يد مختار وصافحه بحرارة ظنا منه أنه بهذا الاتحاد سوف تتحسن تجارته للممنوعات بنسبة كبيرة دون أن يزعجه أحد ويعكر عليه صفو حياته.
▪▪▪▪▪▪▪▪▪
-“آدم طلق نادين!! طيب وإيه السبب اللي خلاه يعمل كده؟!”
قالها رامز بصدمة وهو يتحدث مع سمية عبر الهاتف فقد استطاع خلال الأيام الماضية أن يقنعها بفكرة أنه لن يحاول أن يضغط عليها في مسألة الزواج منها وأنه يكفيه أن يتحدث معها من وقت لأخر حتى يطمئن عليها.