ظهرت ابتسامة واسعة على ثغر رامز الذي هتف بامتنان:
-“شكرا ليك يا حسام وأحب أطمنك وأقولك أن فلوسك هتوصلك لحد عندك”.
هز حسام رأسه رافضا هذا الأمر بقوله:
-“أنا مش بعمل كده عشان الفلوس يا أستاذ رامز وأظن أنت عارف الكلام ده كويس أوي، أنا هدفي هو أني أنتقم
لأبويا الموظف الغلبان اللي عزام قتله بدم بارد لأنه عرف عنه كل بلاويه”.
أنهى رامز المكالمة بعدما شكر حسام للمرة الثانية ثم أخذ يشرب قهوته باستمتاع فقد اقترب من نهاية عزام بتلك الخطوة التي قام بها.
انتهى رامز من احتساء فنجان القهوة ثم أمسك هاتفه واتصل بوسام وأخبره بجميع المستجدات فهتف الأخير بسعادة:
-“عظيم، الخطوة اللي حسام عملها دي هتسهل علينا مجهود كبير أوي وإن شاء الله ربنا يسهل ونخلص قريب من مهاب وعزام”.
هتف رامز بتساؤل بعدما خطر في باله حبيبة التي ذهبت بقدميها إلى عرين الشياطين دون أن تدرك خطورة ما هي مقبلة عليه:
-“عملت إيه يا وسام في موضوع حبيبة؟”
-“أنا مش عايزك تقلق يا رامز خالص من موضوع حبيبة، إحنا مش هنخليها تتجوز من مهاب مهما حصل وهو إن شاء الله هيتسجن قريب وكل بلاويه هتتكشف قدامها قبل ما الفأس تقع في الراس”.
شعر رامز ببعض الارتياح بعدما سمع كلام وسام الذي جعله يطمئن أن حبيبة لن تدفع ثمن جشع أخيها الذي أودى بحياته.