من أهوال الحياة ومصاعبها:
-“أنت ليه يا محمد بتتعامل معايا بالطريقة الصعبة دي؟!”
لمست شيري وجنته وهي تكمل حديثها بخبث:
-“خلاص يا محمد مفيش أي سبب يخليك تبعد عني بعد ما هانيا سابتك واتخلت عنك”.
اقتربت منه أكثر وهي تهمس بخفوت دون أن تتخلى عن ابتسامتها الخبيثة:
-“مفيش أي حاجة هتفرقنا مرة تانية”.
أزاح محمد يدها ودفعها بحدة فترنحت عدة مرات بسبب قوة الدفعة وعندما استقامت واستعادت توازنها وجدته يصرخ في وجهها بنبرة تحذيرية:
-“اطلعي برة بيتي حالا وإلا مش هيحصلك كويس وإذا كنتِ مفكرة أني مش هقدر أجرك من شعرك وأطردك لأني
قاعد على كرسي فأنتِ تبقي غلطانة”.
صرخت شيري بعصبية بعدما شاهدت نظرات الرفض في عينيه:
-“أنت ليه بتعمل معايا كده؟! أنا بحبك وبتمنى ليك الرضا ترضى ومستعدة أعمل أي حاجة عشانك أما هي فتخلت
عنك بعد الحادثة بدل ما تمسك فيك وتقولك الحمد لله أنك بخير وكويس”.
أمسكت شيري بيديه رغما عنه وهمست برجاء:
-“لحد إمتى هتفضل تعاقبني كده يا محمد؟ أنا حبيتك أوي وأنت كنت شايف الحب ده بعينيك ومع ذلك أنت
روحت اتجوزت هانيا وقهرتني”.
أزاح محمد يدها هاتفا بصوته الصارم وهو يشير لها نحو باب الشقة الذي تركه عند دخولها مفتوحا على مصراعيه:
-“بقولك اطلعي برة، ويكون في علمك لو أنتِ الست الوحيدة على كوكب الأرض فأنا مستحيل أتجوزك، أنتِ غلطتِ
لما وقعتِ في حب الشخص اللي عارف عنك كل بلاويكِ، بالله عليكِ قولي كده دلوقتي أي سبب مقنع يخليني أتجوز واحدة خانت ثقة أهلها واتجوزت عرفي من زميلها في الجامعة ولما حست أنه هيخلع منها قررت تحمل منه عشان تدبسه وبعدها راحت لأبوه وقالت ليه على كل حاجة والراجل طلع محترم وأجبر ابنه يتجوزك ويستر عليكِ”.