سارت نادية نحو الحديقة وهي تهمس بصوت منخفض حتى لا يسمعها أحد زملائها:
-“مدام داليا قاعدة دلوقتي مع واحدة صاحبتها وسايبة إسلام يلعب هنا لوحده في الجنينة وأنا هستغل الفرصة وهخليك تشوفه حالا”.
وجهت نادية كاميرا الهاتف نحو إسلام وأشارت له أن يتقدم نحوها وبالفعل استجاب لها الصغير ونظر إلى الشاشة وهو يبتسم على الرغم من عدم فهمه لما يدور حوله.
ابتسم رامز للصغير وأشار له بعلامة ترحيب فهمها إسلام على الفور وقام بردها وهو يضحك بشدة لسبب لم
تتمكن نادية من تفسيره.
-“يلا يا إسلام، قول لرامز إزيك”.
قالتها نادية مشجعة إسلام على التواصل مع أبيه وبالفعل نفذ الصغير كلامها وهتف بصوت خافت التقطه رامز
بصعوبة:
-“إزيك يا رامز، عامل إيه؟”
مسح رامز الدموع التي انهمرت من عينيه هاتفا بفرحة:
-“إزيك أنت يا إسلام، عامل إيه يا حبيبي؟”
أجاب الصغير وهو يمط شفتيه:
-“أنا كويس بس أنت شكلك مش كويس لأنك بتعيط أوي”.
هز رامز رأسه بنفي قائلا:
-“لا يا حبيبي أنا كويس ومبسوط أوي أني شوفتك وبالنسبة للدموع فدي بسبب أني كنت بقطع بصل من شوية”.
ابتسم إسلام وتحدث مع رامز لبعض الوقت قبل أن يمنح الهاتف لنادية التي قربت الهاتف من أذنها قائلة:
-“إيه رأيك يا رامز بيه في المفاجأة دي؟”
عبر رامز عن فرحته وامتنانه الشديدين بقوله:
-“أنا مش عارف أشكرك إزاي على اللي عملتيه معايا دلوقتي”.
شعر رامز ببعض الخوف عندما خطرت له فكرة أن ابنه ربما يشي لوالدته ويخبرها بأمر هذه المكالمة:
-“هو أنتِ مش خايفة أن إسلام يقول لداليا أنك خليتيه يتكلم مع واحد اسمه رامز؟!”
هزت نادية رأسها بنفي هاتفة بثقة تطمئنه بها:
-“لا طبعا مش خايفة؛ لأن إسلام بيحبني جدا وبيسمع كلامي ده غير أنه بيخاف من أمه لأنها بتتعصب عليه كتير وفيه طلبات كتيرة بترفض تنفذها لما بيطلبها وأنا بقى اللي بنفذ ليه كل طلباته وعشان كده هو بيسمع كلامي جدا
ولما بنبه عليه أنه مش يقول حاجة لأمه بيسمع الكلام ومش بينطق قدامها بحرف واحد”.
أنهى رامز المكالمة الهاتفية بعدما وعد نادية أنه سوف يعطيها مكافأة مجزية نظير تعاونها معه وحرصها على نقل المعلومات المتعلقة بابنه أولا بأول.