-بعد ما التعبان اشرف بخ السم في ودان ابويا، حاول عمي السيد يهديه و يقوله ان الكلام اللي اشرف قاله دا كدب، ونسمه قالتله ان مافيش حاجه بيني وبين محمود بحكم انها صاحبتي الوحيده، وأننا مكانش بنخرج الا مع بعض
لكن اشرف رجع تاني وفهمه اننا اكيد متفقين مع بعض عشان تفهم ابوها الكلام ده
بعدها ابويا رفض يستقبلهم في بيتنا وقالهم في وسط الشارع ان طلبهم مرفوض
وابو محمود غصب علي ابنه و بعده عني وسمعنا بعدها بشهر انه خطب واحده من اهله
والحكاية هديت على كده فتره، لحد دخلة الشتا كنا لسه في نوة الفيضة
واحنا الدنيا لما بتشتي عندنا الكهربا بتقطع
انا ونسمه كنا راجعين من المنشية ساعتها ماعرفش ايه اللي جاب محمود قدمنا بس وفجأه لقيته بيعترض طريقنا في الضلمة
وقفت نسمه تقوله :عايز ايه مننا يا محمود امشي من هنا الله لا يسيئك احنا مش عايزين مشاكل
قالها : ولا اني بعمل مشاكل يا نسمه ولا كنت ناوي على الشر من أصله، بالعكس انا كنت رايدها في الخير وعايزها في الحلال
رفعت عيني ليه وقولتله : انت مش خلاص خطبت، عايز مني ايه بقى اتكل على الله وشوف طريقك بعيد عني
زق نسمه بأيده وبعدها من ما بينا وقالي
بس انا عايزك انتي، قولي انك موافقه وانا أقف في وش الكل عشانك قولي انك عايزانى زي ما انا عايزك وانا
احارب عيلتك كلها ونتجوز غصب عن أي حد
بعدت عنه ومسكت ايد نسمه واني بنقوله: اني لا عايزاك ولا عايزة غيرك ابعد عني وإياك تعترض طريقي تاني
بس هو ماعجبهوش الكلام وقالي بغضب
مش هتكوني لغيري يا شذى
خوفت من كلامه وشديت نسمه وجريت على شارعنا
كان اشرف واقف على القمه وشافنا واحنا بنجري ساب أصحابه وجالنا ووقفنا احنا الاتنين وزعق فينا
-جايه منين يا بت انتي وهي الساعه دي وبتجرو كده ليه وكأن في حد بيجري وراكم
بيقت واقفه بتلفت حواليا خايفه لمحمود يعدي واحنا واقفين، وأشرف يعترض طريقه والعركه تقوم بينهم تاني،
لكن نسمه قدرت تسيطر على الموقف كله وردت عليه بجراءه
-كنا في المنشيه بنجيب حاجات زي مانت شايف، والمطره نازلت علينا في جرينا وسع بقى خلينا ندخل البيت ولا